«Վրաստանը կներկրի աշխարհի լավագույն հակակորոնավիրուսային պատվաստանյութը». Թբիլիսիի ինֆեկցիոն հիվանդանոցի տնօրեն
Pfizer հակակորոնավիրուսային պատվաստանյութը Վրաստանում կլինի մարտի 22-ին: Այս մասին հայտարարել է Թբիլիսիի ինֆեկցիոն հիվանդանոցի տնօրեն Թենգիզ Ցերցվաձեն, գրում է Грузия Онлайн պորտալը:
Նրա խոսքով՝ Վրաստանը կստանա ևս մեկ շատ լավ պատվաստանյութ՝ «Նովովաքս»-ը, որի վաճառքն աշխարհում կսկսվի հունիսին, իսկ Վրաստանը կդառնա դրա առաջին օգտագործողը: Ցերցվաձեն չի բացառել, որ միջազգային ճանաչում ստանալու և դրա արդյունավետությունը հաստատվելու դեպքում երկիրը կստանա նաև չինական պատվաստանյութ:
«Հիմա՝ մարտի 22-ին, կգա Pfizer-ի խմբաքանակը, այնուհետև կժամանի AstraZeneca-ի 80 000-անոց խմբաքանակը, այնուհետև AstraZeneca-ն նորից կներկրվի երկկողմ համաձայնագրով, բայց այս անգամ պետությունների համաձայնությամբ, և ոչ թե միջազգային գործիքների միջոցով: Հնարավոր է նաև, բայց դեռևս որոշված չէ, որ միջազգային ճանաչման և դրա արդյունավետության հաստատման դեպքում չինական պատվաստանյութը նույնպես ներմուծվի: Եվ ամենակարևորը, միլիոնավոր դոլարների պայմանագիր է պատրաստվել գործնականում լավագույն պատվաստանյութերից մեկի` «Նովովաքս»-ի հետ կապված, որը դեռ չի վաճառվում աշխարհում: Վաճառքը կսկսվի հունիսին, և Վրաստանը կլինի դրա առաջին օգտագործողը, և ինչպես ասում են, և ես հավատում եմ, քանի որ կարդացել եմ փաստաթղթերը, սա կլինի աշխարհի լավագույն պատվաստանյութը, որը կարտադրվի այլ տեխնոլոգիայով»,-ասել է Ցերցվաձեն:
Նրա խոսքերով` Վրաստանում պատվաստումներն ընթանում են դանդաղ տեմպերով, քանի որ եթե ցանկանում են մինչև տարեվերջ պատվաստել բնակչության 60-65%-ը, ապա մեկ օրվա ընթացքում պետք է պատվաստվի 3000 մարդ: