Բանակը քանդեցին վերջին 3 տարվա ընթացքում, սկսեցին գեներալներին, զինվորականներին որակավորել որպես կաշառակերներ ու չիմացողներ, կամաց-կամաց հիասթափեցրին բանակի հրամանատարական կազմին. Իգոր Սարգսյան
Երևի թե Սասուն Միքայելյանն ու Նիկոլ Փաշինյանը 30 տարի բանակ չեն ունեցել, նրանց բանակը եղել է «ֆեյքերը», «սորոսները», ապազգային տարրերը, մորթապաշտները, և տրամաբանական է, որ ինքը պետք է ասի, որ բանակ չենք ունեցել. այս մասին ՊՆ շենքի դիմաց ԳՇ պետ Օնիկ Գասպարյանին աջակցող ակցիայի ընթացքում ասաց Բնապահպանության և ընդերքի տեսչական մարմնի ղեկավարի նախկին տեղակալ Իգոր Սարգսյանը՝ անդրադառնալով Սասուն Միքայելյանի այն հայտարարությանը, որ 30 տարի բանակ չենք ունեցել:
Նշենք, որ Պաշտպանության նախարարության դիմաց զինվորականները և քաղաքացիները ակցիա են անում՝ ի պաշտպանություն Գլխավոր շտաբի պետ Օնիկ Գասպարյանի:
«Բանակ ունեցել ենք 30 տարի՝ սկսած 1991 թվականից, և բանակն օրեցօր հզորացել է: Բանակը քանդեցին վերջին 3 տարվա ընթացքում, ինչով հնարավոր էր քանդել, քանդեցին, սկսեցին որակավորել գեներալներին, զինվորականներին կաշառակերների ու չիմացողների և կամաց -կամաց քանդեցին, հիասթափեցրին բանակի հրամանատարական կազմին, մարդկանց, ովքեր օրուգիշեր խրամատներում, առաջին գծում կայացնում էին բանակը: Անհրաժեշտ է հավաքվել և սատարել բանակին, ԳՇ պետը, գեներալները շատ լավ գիտեն իրենց պարտականությունները, և բանակի վերակազմակերպելը կարճ ժամանակի խնդիր է»,- նշեց նա:
Սարգսյանի խոսքով՝ մեր ազգի, մեր պետականության անվտանգության համար առաջին, գլխավոր երաշխավորը բանակն է, իսկ այն հայտարարությունները, թե Գլխավոր շտաբը քաղաքական հայտարարություն է արել, նրա կարծիքով, միտված է բանակը քանդելուն.
«Ուժեղները միշտ մտածում են ուժեղ բանակ ունենալու մասին, ու 30 տարվա ընթացքում մեր հաղթանակներն ուժեղության դրսևորում էին, և հաղթեցինք 30 տարվա մեջ, սակայն այլ պետությունների հետախուզությունների ուղղորդմամբ շարժվող այս իշխանությունները՝ Նիկոլ Փաշինյանի գլխավորությամբ, բերեցին բանակի, համընդհանուր ժողովրդի պարտության և հիասթափության»: