Հայաստանում ռազմական հեղաշրջման փորձ չի եղել. հեղաշրջումներն այլ կերպ են տեղի ունենում. քաղաքագետ

Հայաստանում ռազմական հեղաշրջման փորձ չի եղել. հեղաշրջումներն այլ կերպ են տեղի ունենում: Այս մասին փետրվարի 27-ին մամուլի ասուլիսում ասաց Կովկաս ինստիտուտի տնօրեն Ալեքսանդր Իսկանդարյանը:

«Սա ոչ մի պուտչ չի: Հեղաշրջումներն այսպես չեն լինում: Նախ շրջապատում են որեւէ շենք, հետո հայտարարություն է արվում: 15 րոպե հետո տանկերը կամ զրահամեքենաները կանգնում են փողոցներում: Իսկ սա կոչ է, այլ ոչ թե հեղաշրջում: Զինվորականները հրաժարական ներկայացնելու կոչով են դիմել: Ինչ վերաբերում է բախումների հավանականությանը, ապա այդպիսի հավանականություն միշտ կա, երբ հանրությունը պառակտված է: Զայրույթի պահին ինչ-որ մեկը կարող է մյուսի մռութին խփել, եւ դրանից մեծ անախորժություն կստացվի: Բայց առայժմ այդպիսի բան չեմ տեսնում»,- նշեց քաղաքագետը:

Մեկնաբանելով իրավիճակը՝ Իսկանդարյանն արձանագրեց, որ հեղափոխության հենց սկզբից տեղի ունեցած գործընթացները, խմբերի միջեւ եղած հակասությունները ներխուժեցին հանրային ոլորտ: Բանակի վարվելակարգի առանձնահատկություններից ելնելով՝ գործընթացները երկար ժամանակ թաքնված էին, բայց վերջին հարցազրույցները՝ նախ Սերժ Սարգսյանի, ապա Նիկոլ Փաշինյանի պատասխան հարցազրույցը, որում նա ոչ այնքան ստուգված հայտարարություն արեց, դարձան յուրատեսակ ձգան: «Այս պատճառով միացավ տումբլերը: Սա զենքի հետ կապ չունի: Սա ներքաղաքական դիսկուրս է, բայց այն հուզեց բանակին»,- նշեց քաղաքագետը: Նրա կարծիքով՝ ընթանում է դժվար բանակցային գործընթաց է՝ փորձելով կանխել հակամարտության խորացումը: «Թույլ իշխանություն եւ թույլ ընդդիմություն: Վերջին տասնամյակներին Հայաստանի համար հատկանշական իրավիճակ»,- ասաց Իսկանդարյանը:

Պատերազմից հետո հակասությունները խորացան, եւ այժմ դրանք գտնվում են ճամփաբաժանին, իսկ հնարավոր են տարբեր տարբերակներ: «Համոզված եմ, որ բանակցություններ են ընթանում: Քաղաքական վերնախավերը ընդդիմության հետ, ուղղակի կամ անուղղակի բանակցություններ»,- շարունակեց Իսկանդարյանը՝ որպես ամենահավանական տարբերակ մատնանշելով արտահերթ ընտրությունների հնարավորության քննարկումը: Նրա խոսքով՝ Սերժ Սարգսյանը Նիկոլ Փաշինյանին այնպիսի փայլուն Սահմանադրություն եւ ԸՕ է թողել, որ նրան իշխանությունից հեռացնելն անհնար է թվում: «Պետք է փողոցից ճնշում գործադրվի, սակայն դեռեւս չի հաջողվում: Բայց իրավիճակը չի բարելավվի: Նիկոլ Փաշինյանի վարկանիշն ընկնում է, ինֆլյացիան աճում է, տնտեսությունն անկում է գրանցում, ղարաբաղյան հակամարտությունը լուծված չէ: Կարծում եմ, որ այժմ իշխանությունները մտահոգված են այն հարցով, թե ինչպես կազմակերպեն ընտրությունները, որ իշխանության մնան, իսկ ընդդիմությունը մտահոգված է այն հարցով, թե ինչպես գա իշխանության: Թույլ տարակազմ կառավարության եւ թույլ տարակազմ ընդդիմության իրավիճակը պահպանվում է»,- ասաց քաղաքագետը:

ԱՊՀ երկրների ինստիտուտի հայկական մասնաճյուղի ղեկավար Ալեքսանդր Մարկարովը նշեց, հանրությունը պառակտված է, բայց դեռեւս բեւեռացված չէ: Սակայն, եթե միտումները շարունակվեն, բախումը հավանական է: Իշխանությունը չի ցանկանում հեռանալ, բայց արդյունավետ կառավարելու մեխանիզմներ չունի, եւ կա ընդդիմություն, որը ցանկանում է իշխանության գալ, բայց չի կարողանում: Այսպիսի ճոճանակ, որտեղ ճնմշումը չի հասել այն աստիճանին, որ իշխանություններին ստիպի սկսել անկեղծ բանակցություններ կամ հայտարարել արտահերթ ընտրությունների մասին: