Կլինցևիչ. Եթե Փաշինյանը շարունակի խաղեր տալ Արևմուտքի հետ, հետևանքները նրա և Հայաստանի համար կարող են լուրջ լինել

Երևանի պարտությունը ոչ մի կապ չունի «Իսկանդեր»-ների հետ, որոնք հմուտ ձեռքերում հուսալի սպառազինություն են: Այս մասին հայտարարել է ռուս քաղաքական գործիչ և զինվորական, նախկին սենատոր Ֆրանց Կլինցևիչը՝ մեկնաբանելով Նիկոլ Փաշինյանի սկանդալային հայտարարությունը:

«Երևանը չունի «Իսկանդեր»-ների և զինամթերքի այնպիսի քանակ, որոնք սկզբունքորեն կարելի կլիներ օգտագործել որևէ իրական ռազմական խնդիր լուծելու համար: Բացի այդ, այս համակարգերը պետք է ճիշտ օգտագործել: Ինչ վերաբերում է արձակմանը, որը, Փաշինյանը ներկայացրեց որպես անհաջող, ապա պետք է հասկանանք, թե որոնք են խնդիրները: Թերևս պատճառը անձնակազմի վատ պատրաստվածությունն է»,- ФАН-ին տված իր մեկնաբանության մեջ ասել է Կլինցևիչը:

Ինչ վերաբերում է Ադրբեջանի հետ պատերազմում պարտության պատճառներին, ապա ռազմական առումով ուժերը չափազանց անհավասար էին, նշել է ռուս քաղաքական գործիչը:

«ԼՂՀ-ում զորքերը փաստացիորեն քողարկված չէին, երբ Ադրբեջանը օգտագործում էր թուրքական գրոհային անօդաչու թռչող սարքերը՝ ջերմացույցներով: Այս անօդաչուները հեշտությամբ խոցում էին ռազմական թիրախները՝ հրթիռային համակարգեր, տանկեր և այլն: Քանի որ աշխատող շարժիչները ջերմություն են արձակում: Անգամ քողարկված տանկը ժամանակակից պատերազմում չես կարող թաքցնել»,- ասել է նա:

Կլինցևիչի խոսքով՝ Ղարաբաղի պաշտպանները, պարզվեց, անզոր էին տեխնիկական այն առավելության հանդեպ, որ ցուցաբերում էր Ադրբեջանը, որին աջակցում էր Թուրքիան: Բայց խնդիրը միայն սա չէ, այլ նաև Հայաստանի ղեկավարության քաղաքական վայրիվերումները, կարծում է ռուս քաղաքական գործիչը:

«Ինքնիշխանություն, բազմաբևեռություն և անկախություն խաղալով, փորձելով գոհացնել Արևմուտքին և միաժամանակ շահագործելով Ռուսաստանին, Փաշինյանը փորձում է հաճոյանալ և՛ մերոնց, և՛ ձերոնց: Բայց երկու աթոռի վրա նստել չի կարելի: Այս խաղերը ոչ մի լավ բանով չեն ավարտվում: Այո, Փաշինյանը իմաստուն քայլ կատարեց, լսեց Ռուսաստանին, դադարեցրեց պատերազմը, բայց եթե նա շարունակի խաղեր տալ Արևմուտքի հետ, հետևանքները նրա, և նաև հենց Հայաստանի համար կարող են շատ լուրջ լինել»,- ընդգծել է Կլինցևիչը։