Clubhouse. Ի՞նչ է դա, ինչի՞ համար է պետք եւ ինչո՞ւ են դրա մասին բոլորը խոսում

Clubhouse-ը նոր սոցցանց է, որտեղ օգտատերերը կարող են շփվել միայն ձայնի միջոցով: Այն հիշեցնում է ազատ ռադիո առանց ձեւաչափի, որի շրջանակում պարբերաբար տեղի են ունենում երեկույթներ, համաժողովներ, արհմիության հավաքներ, տարբեր տեսակի բանավեճեր եւ շոու:

Այս պահին հարթակը մնում է փակ լայն հասարակության համար, սոցցանցում կարող են հայտնվել միայն ծանոթների օգնությամբ, որոնք արդեն հասանելիություն են ստացել հավելվածի նկատմամբ: Սոցցանց ստեղծվել է 2020 թվականի գարնանը:

Clubhouse-ը հորինել են Սթենֆորդի համալսարանի շրջանավարտներ Փոլ Դեւիսոնը եւ Ռոեն Սեթը: Արդեն 2021 թվականի հունարին հավելվածը, որը դեռ աշխատում է IOS-ի վրա, գնահատվել է 1 միլիարդ դոլար: Ստեղծողները նշում են, որ հարթակի գլխավոր սկզբունքներից է «անկեղծ շփումը»:

Այն ներբեռնել են ավելի քան 8 մլն անգամ, մեկ շաբաթում աշխարհում սոցցանցի լսարանն ավելացել է 1,5 անգամ: Ամենից ակտիվ դրանից օգտվում են ԱՄՆ-ում (2,62 մլն), Ճապոնիայում (1,42 մլն) եւ Գերմանիայում (626 հազար):

Այն Apple Store-ում ներբեռնումների թվով առաջ է անցել TikTok-ից եւ Telegram-ից:

Ինչո՞ւ Clubhouse-ն այդքան հայտնի դարձավ

Փորձագետները կարծում են, որ սոցցանցի հայտնիությունը կարելի է բացատրել համաշխարհային մասշտաբի հայտնիների ցուցակով, որոնք գրանցվել են սոցցանցում: Նրանց թվում են Իլոն Մասկը, Մարկ Ցուկերբերգը, Քանիե Ուեսթը եւ Ջարեդ Լետոն:

Clubhouse-ի հիմնադիրները շեշտը դրել են կենդանի շփման վրա: Սոցցանցը կազմված է ըստ հետաքրքրությունների «սենյակներից» եւ «ակումբներից»: Յուրաքանչյուր օգտատեր կարող է ցանկացած թեմայով զրույցի համար «սենյակ» ստեղծել, որից հետո նրա հետեւորդները զրույցին միանալու առաջարկով ծանուցում կստանան:

Հաջորդ քայլը՝ նման ծանուցում կստանան արդեն միացածների հետեւորդները: Այդպիսով, շղթայական արձագանք է սկսվում, եւ «սենյակներում» մասնակիցներն ավելանում են:

Ընդ որում, բոլոր մարդիկ զրույցի ժամանակ կիսվում են խոսնակների եւ լսողների: Այն բանից հետո, երբ օգտատերը երեք անգամ մասնակցել է «սենյակներում» բանավեճերին, կարող է ստեղծել իր մշտական «ակումբը»: Սոցցանցում բոլոր «սենյակները» կարող են լինել հանրային, պրիվատ կամ հասանելի միայն ակումբի որոշակի անդամների համար: Յուրաքանչյուր «սենյակի» կարող է միանալ մինչեւ 5 հազար մարդ:

Ինչպե՞ս հայտնվել սոցցանցում

Clubhouse-ը դեռ մնում է փակ սոցցանց՝ չնայած հիմնադիրները խոստանում են այն բաց դարձնել մոտ ապագայում: Այժմ այնտեղ կարելի է հայտնվել երկու միջոցով՝ ստանալ հրավեր արդեն գրանցված օգտատերից կամ գրանցման հայտ ներկայացնել եւ սպասել, թե երբ կոնտակտների ցուցակից ինչ-որ մեկը, ով արդեն գրանված է, հավանություն կտա հայտին: Սակայն ամեն ինչ այդքան հեշտ չէ, ծանոթից հավանություն սպասելը կարող է երկար տեւել, քանի որ օգտատերերի թիվը դեռ սահմանափակ է:

Ի՞նչ է կարելի, իսկ ի՞նչ՝ ոչ

Clubhouse-ն իր օգտատերերին խնդրում է որոշ կանոններ պահպանել: Օրինակ, բոլոր օգտատերերը պետք է հավելվածում օգտագործեն իրենց իրական անունն ու լինեն 18 տարեկանից բարձր: Իհարկե, դա դեռ չի հաջողվում վերահսկել:

Clubhouse-ում արգելված է հետապնդումը, խտրականությունը, վիրավորանքը եւ կեղծ տեղեկության տարածումը: Ինչպես նաեւ չի կարելի ձայնագրել խոսակցությունները, որոնք տեղի են ունենում «սենյակներում»: Յուրաքանչյուր մասնակից կարող է հարթակի կանոնները խախտողի պահվածքի համար բողոք ներկայացնել, որից հետո Clubhouse-ը հետաքննություն կանցկացնի եւ համապատասխան որոշում կկայացնի:

Առաջին խնդիրները, առաջին արտահոսքը

Clubhouse որեւէ ցենզուրայի եւ մոդերացիայի բացակայությունն արդեն առաջին վեճերն է առաջացրել սոցցանցում: VICE պարբերականը հայտնել է, որ հավելվածում լայնորեն տարածված են կորոնավիրուսի եւ պատվաստանյութերի մասին կոնսպիրոլոգիական տեսությունները: Vanity Fair-ի տվյալներով՝ Clubhouse-ի «սենյակներից» մեկում խոսել են Փարիզում ահաբեկչության մասին, որի ընթացքում ֆրանսիական էթիկայի եւ հանրային քաղաքականության կենտրոնի աշխատակիցը ծայրահեղական արտահայտություններ է թույլ տվել այդ իրադարձություններում մուսուլմանների դերի մասին: Հավելվածը միջոցներ չի տրամադրում ապատեղեկատվությանը դիմակայելու համար: Հավելվածում չկան բաժիններ մեկնաբանությունների համար, չկան «լայքի» կամ այլ արձագանքման կոճակներ, որոնք թույլ են տալիս անհամաձայնություն հայտնել կամ կիսվել տեղեկությամբ:

Ընդ որում, հետաքննության ընթացքում լրագրողներին հաջողվել է օգտատերերից ստանալ այդ խոսակցության ձայնագրությունը՝ չնայած նրան, որ ըստ հավելվածի կանոնների դա արգելված է:

Հետագայում «զգայուն» թեմաներով խոսակցությունների արտահոսքը կարող է սոցցանցից օգտատերերի մի մասի, մասնավորապես, հայտնիների կողմից հրաժարման պատճառ դառնալ, որոնք այժմ օգտվում են Clubhouse-ից այն պատճառով, որ մասնակիցների թիվը սահմանափակ է, իսկ խոսակցությունների բովանդակությունը չի հրապարակվում:

Հոդվածը պատրաստվել է BBC-ի, DW-ի, Meduza-ի, Delfi-ի, RBC-ի նյութերի հիման վրա