«Ղարաբաղից հետո Արևմուտքը Վրաստանին մղում է Մոսկվայի հետ առճակատման»․ «Չեզոք Վրաստան»-ի նախագահը` վարչապետի հրաժարականի և դրան հաջորդած հավանական զարգացումների մասին

Վրաստանի վարչապետի պաշտոնի գլխավոր թեկնածու Իրակլի Ղարիբաշվիլին իշխանության գալու դեպքում, ամենայն հավանականությամբ, կշարունակի երկրում զարգացնել արևմտամետ քաղաքականությունը: EADaily-ի հետ զրույցում նման կարծիք է հայտնել է «Չեզոք Վրաստան» կուսակցության նախագահ Վալերի Կվարացխելիան։

Նրա կարծիքով՝ Գիորգի Գախարիայի՝ կառավարության ղեկավարի պաշտոնից անսպասելի հրաժարականը կարող էր պայմանավորված լինել ԱՄՆ-ից եկող ճնշմամբ:

«Հավանաբար, նրան ակնարկել են, որ պետք է հեռանա։ Իսկ թե ով է ակնարկել՝ դա արդեն ուրիշ հարց է։ Դա կարող է լինել և՛ Բիձինա Իվանիշվիլին, և՛ մեր արտասահմանյան «ռազմավարական գործընկերները»։ Համենայնդեպս, երկրորդ տարբերակը չեմ բացառում»,- պարզաբանել Է Վալերի Կվարացխելիան։

Նա նշել է, որ ԱՄՆ-ն կարող է դժգոհ լինել Անդրկովկասում աշխարհաքաղաքական իրավիճակի փոփոխությունից և այդ տարածաշրջանում Ռուսաստանի դերի հնարավոր ուժեղացումից:

«Ղարաբաղից հետո մեզ մոտ փոխվում է ամբողջ աշխարհաքաղաքական իրավիճակը։ Ռուսաստանը փորձում է ուժեղացնել իր դիրքերը, սակայն Արևմուտքը չի ցանկանում կորցնել Վրաստանը, այդ պատճառով էլ Մոսկվայի հետ առճակատման համար փորձում է մոբիլիզացնել Թբիլիսին»,- ենթադրել է վրացի քաղաքական գործիչը։

Նա նաև մտավախություն է հայտնել, որ Գախարիային Ղարիբաշվիլիով փոխարինելը կարող է «Վրացական երազանք» իշխող կուսակցության ներսում պառակտման հանգեցնել։

Այն ենթադրությանը, որ Իրակլի Ղարիբաշվիլին, այնուամենայնիվ, կարող է երկխոսության գնալ Մոսկվայի հետ, քանի որ 2014-ին տված հարցազրույցում հայտարարել էր, որ «Վրաստանի խնդիրն է բարելավել իր հյուսիսային հարևանի հետ հարաբերությունները», փորձագետը պատասխանել է, որ ներկայիս քաղաքական իրողություններում դա քիչ հավանական է, քանի որ Վրաստանի ամբողջ քաղաքական վերնախավը արևմտամետ է:

«Բոլորը բացարձակապես արևմտամետ են՝ և՛ իշխանությունը, և՛ ընդդիմությունը։ Ե՛վ Ղարիբաշվիլին, և՛ Իվանիշվիլին, որը փաստացի ոչ մի տեղ էլ չի հեռացել, և կառավարում է քաղաքական գործընթացները, որովհետև կուսակցության ներսում չեն կարողանում կառավարել առանց Իվանիշվիլիի։ Ես առհասարակ կարծում եմ, որ քանի դեռ իշխանությունը վերջինիս ձեռքում է, ոչինչ չի փոխվի։ Իսկ եթե Իվանիշվիլին իսկապես հեռանա, ապա կգան «Միասնական ազգային շարժում» կուսակցության ներկայացուցիչները՝ Սաակաշվիլիի և Մելիայի գլխավորությամբ, և իրավիճակն ավելի կսրվի»,-եզրափակել է Կվարացխելիան։

Հիշեցնենք, որ նախօրեին Վրաստանի վարչապետ Գիորգի Գախարիան հրաժարական է տվել: Այս մասին նա հայտնել է հատուկ հրավիրված ճեպազրույցի ժամանակ:

Ավելի ուշ, մեկնաբանելով իր հրաժարականի պատճառը, Գախարիան ասել էր․ «Կարծում եմ, որ երկրի ներսում առճակատումը սպառնում է Վրաստանի ապագա ժողովրդավարական և տնտեսական զարգացմանը: Ուստի ես հայտարարել եմ իմ հրաժարականի մասին՝ բևեռացումը նվազեցնելու և իրավիճակի լիցքաթափման հույսով»։

ԶԼՄ-ները նշում են, որ Վրաստանի վարչապետը հրաժարական է տվել հինգշաբթի`ընդդիմադիր Նիկա Մելիայի շուրջ թիմի հետ ունեցած տարաձայնությունների պատճառով, որին դատարանը հրամայել էր ձերբակալել գրավը չվճարելու համար: Գախարիան անընդունելի է համարում ընդդիմադիր գործչի ձերբակալումը, որը, ըստ նրա, կարող է երկրում առանց այդ էլ լարված քաղաքական իրավիճակի սրման պատճառ դառնալ: Վրաստանի ՆԳՆ-ն դադարեցրել է Մելիայի կալանքի գործընթացը վարչապետի հրաժարականից հետո:

Վրաստանում իշխող «Վրացական երազանք» կուսակցությունը երկրի վարչապետի պաշտոնում առաջադրել է պաշտպանության նախարար Իրակլի Ղարիբաշվիլիին: