«Արցախի նախագահը պետք է պատասխան տա այն բանի համար, որ իրեն ուզել են օգնել նախկին նախագահները և նա մերժել է». Էդմոն Մարուքյան

Արցախի հանձնված տարածքներում ներդրումներ են արվել, ներդրումներին կողմ եմ, եթե չպիտի տայինք Ադրբեջանին: Պետք է հարցը 30 տարի լուծվեր ու ներդրումներ չարվեին: Ասում էին, որ մենք բանակցում էինք, որ տայինք, ես էլ ասում եմ՝ եթե բանակցում էինք, որ տայինք, ուրեմն պետք է այդ ուղղությամբ աշխատանք տարվեր, ոչ թե մեզ պատրաստեին չտալուն, ու հետո գաղտնիքը ասեին, բոլորս էլ ուզում էինք տայինք: Այս մասին լրագրողների հետ ճեպազրույցի ժամանակ ասաց «Լուսավոր Հայաստան» խմբակցության նախագահ Էդմոն Մարուքյանը, անդրադառնալով իր ֆեյսբուքյան էջում արված այն հայտարարությանը, թե ՀՀ երրորդ նախագահի հարցազրույցում կարմիր թելով անցնում էր այն միտքը, որ բանակցությունների ողջ ընթացքում ենթադրվում էր 5+2 շրջանների փոխանցում Ադրբեջանին, և եթե այդպես է, ապա ինչո՞ւ էին միլիոնավոր դոլարներ ծախսվում այդ տարածքների զարգացման վրա:

«Անընդհատ ասվել է, որ մենք բանակցում էինք, բայց տալու ոչ մի նպատակ չունենք, ասվել է, որ բանակցում ենք ձգձգելու համար և չենք տալու ոչ մի բան: Նախկին իշխանության, բոլոր հանրապետական պատգամավորներն ասել են, որ այս իշխանությունն ուզում է տալ և քննադատվել է այդ հարցով, հիմա նախագահ Սերժ Սարգսյանը ասում է, որ ես միշտ եղել եմ այն գծի մեջ, որ պետք է գնալ այդ ճանապարհով, և ոչ մի թիզականությունը քննադատում է, ես էլ հարց եմ բարձրացնում, եթե այդպես է այդ խնդիրը պետք է արագ լուծվեր և ոչ թե հայ ժողովրդի, սփյուռքի, ՀՀ քաղաքացիների հարկատուների գումարները ներդրվեր այն տարածքներում, որը մենք պետք է տայինք Ադրբեջանին»,- նշեց նա:

Էդմոն Մարությանի խոսով՝ հաջորդ հանգամանքը այն է, որ Արցախում գրվել է Սահմանադրություն, որ բոլոր 7 շրջանները Արցախի Հանրապետության տարածքն են համարվում և անքակտելի են, այսինքն՝ ըստ նրա՝ թղթի վրա գրվել է այլ բան, իսկ ժողովրդին մատուցվել է, որ սա ձեր տարածքն է և որևէ մեկը չի կարող ոտնձգություն անել, և միաժամանակ այդ տարածքները փոխանցելու համար բանակցություններ են արվել:

Էդմոն Մարուքյանը, անդրադառնալով ՀՀ երրորդ նախագահի հարցազրույցին նշեց, որ լսելով նախագահին՝ կրկին համոզվել է, որ պետք է, անպայման, պարիտետային փաստահավաք խումբ ստեղծել, պատերազմի հանգամանքները քննելու համար, որովհետև «այն, ինչ ասում է Սերժ Սարգսյանը 90 տոկոսով հենց այդպես էլ եղել»։

«Ես հոկտեմբերի 2-ին հասել եմ Արցախ և այնտեղ իմացել եմ, որ թույլ չեն տվել նախկին փորձառու գեներալներին մասնակցել պատերազմի հետ կապված խնդիրներին: Ինձ ասվել է, որ աբսուրդ է, ինչի՞ են նման բան անում, զանգել են և ասել են, թող դուրս գան սենյակից, չեմ կարող ասել, թե դա որ սենյակն է՝ բունկերն է, թե ո՞ր տեղից և բոլորը շատ հիասթափված, նեղացած Արցախի Ստեփանակերտ մայրաքաղաքի հրապարակում կանգնած էին, ես դա տեսել եմ, իմացել եմ: Այսինքն՝ իշխանությունը դրա համար պետք է պատասխան, Արցախի իշխանությունը պետք է պատասխան տա նրա համար, որ իրեն ուզել են օգնել, նախկին նախագահները հանդիպում են խնդրել, և նա փաստորեն մերժել է այդ հանդիպումը, և մեկը չի տվել պատասխան, թե ինչո՞ւ է մերժել, և այսպիսի բազմաթիվ հարցեր կան»:

Ըստ նրա, եթե հիմա չստեղծվի պարիտետային քննիչ հանձնաժողով, բոլոր հանգամանքները չքննվեն, հետո կարող է ուշ լինել․ «Ասում են՝ թող Նիկոլը հեռանա, հետո կքննենք, այս ինֆորմացիաները հնանալու են և այս ինֆորմացիաների մասին վկայություններ տվողները կարող են հետո այլ վկայություններ տալ, չեմ բացառում, որ հետո կարող են չտալ: ՀՀ 3-րդ նախագահի հարցազրույցի երկրորդ մասը դիտելուց հետո կրկին այն կարծիքի եմ, որ պետք է քննության առարկա դառնա այդ օրերին տեղի ունեցած քաոսը, Շուշիից սկսած՝ Հադրութով վերջացրած»: