Գերմանիայի էկոնոմիկայի նախարարը «Հյուսիսային հոսք-2» գազատարի շինարարությունն ավարտելուն կողմ է արտահայտվել
Գերմանիայի էկոնոմիկայի նախարար Պետեր Ալթմայերը «Հյուսիսային հոսք-2» գազատարի շինարարությունն ավարտելուն կողմ է արտահայտվել՝ չնայած ՌԴ-ում հայտնի ընդդիմադիր Ալեքսեյ Նավալնիի դեմ կայացված դատավճռի, հաղորդում է DW-ը:
Այդ նախագծի շուրջ քննարկումները պետք չէ խառնել Ռուսաստանում մարդու իրավունքների խախտումների մասին քննարկումների հետ, ասել է Ալթմայերը Bild am Sonntag գերմանական շաբաթաթերթին տված հարցազրույցում:
«Արդեն բազում տասնամյակներ գոյություն ունեցող տնտեսական կապերը եւ ձեռնարկությունների տնտեսական նախագծերը չի կարելի համեմատել մարդու իրավունքների կոպիտ խախտումների եւ դրանց նկատմամբ մեր արձագանքի հետ: Եթե «Հյուսիսային հոսք-2»-ն ավարտին չհասցվի, ապա Ռուսաստանն արդյունքում պակաս գազ չի վաճառի, քանի որ «Հյուսիսային հոսք-1»-ն ու Ուկրաինայի միջով անցնող գազատարը կշարունակեն աշխատել: Սակայն գերմանական ձեռնարկությունները կկորցնեն հսկայական ներդրումներ: Ուստի ես հորդորում եմ առարկայական քննարկում վարել»,-պարզաբանել է ԳԴՀ էկոնոմիկայի նախարարը:
Միեւնույն ժամանակ Պետեր Ալթմայերն անվանել է բավականին ընդունելի Նավալնիի դատավճռի շուրջ Եվրամիության քննարկումները:
«Ալեքսեյ Նավալնիի դատավճիռը չլսված գործողություն է, որն աղերս չունի իրավական դաշտում գործողությունների հետ: Սակայն Եվրամիության արձագանքը կարող է լինել միայն ընհանուր առմամբ ԵՄ պատասխանը»,-ընդգծել է ԳԴՀ էկոնոմիկայի նախարարը:
«Հյուսիսային հոսք-2»-ն արդեն ավելի քան 90 տոկոսով կառուցված է: Փետրվարի 6-ի երեկոյան Nord Stream 2 AG ընկերությունը հայտնել է խողովակները տեղադրելու շուրջ աշխատանքները շարունակելու մասին: Բազմաթիվ եվրոպական երկրներ, այդ թվում՝ Ֆրանսիան, քննադատում են այդ նախագիծը: ԱՄՆ-ը պայքարում է դրա դեմ պատժամիջոցներ սահմանելով, սակայն Գերմանիայի կառավարությունը, չնայած Նավալնիի եւ նրա կողմակիցների նկատմամբ ճնշումներին, չի հրաժարվում «Հյուսիսային հոսք-2»-ից: