Փաշինյանը, չունենալով փորձ և գիտելիքներ ու չափից դուրս բարձր կարծիքի լինելով իր «ռազմավարական տաղանդի» մասին, ԼՂ հարցի լուծման համար զբաղվում էր պոպուլիզմով. «Առավոտ»

«Առավոտ» թերթը գրում է.

«Վս­տահ եմ, որ վերջին 20 տարում, առնվազն մինչև 2020 թվականի սեպտեմբերի 27-ը մենք հնարավորություն ունեինք երկարատև հեռանկարով լուծել ԼՂ խնդիրը՝ ապահովելով նախկին ԼՂԻՄ-ի ողջ տարածքում մեր հայրենակիցների խա­ղաղ կյանքը և Հայաստանի հետ միջանցքը: Բայց մեր ղե­կավարները և մեր քաղաքական միտքը [ու ես էլ՝ բոլորի հետ միասին] ի զորու չեղան գնալ այդ լուծումների ճանապար­հով: Երկրորդ և երրորդ նախագահները գերադասում էին խնդիրը «խորամանկորեն» ձգձգել, իսկ ներկայիս վարչապե­տը, չունենալով փորձ և գիտելիքներ ու չափից դուրս բարձր կարծիքի լինելով սեփական «ռազմավարական տաղանդի» մասին, անում էր այն, ինչը նրա մոտ լավ է ստացվում՝ զբաղվում էր պոպուլիստական հռետորաբանությամբ, հոխոր­տում էր և աքլորանում:

Հեղափոխություն անելու համար դա խիստ անհրաժեշտ է, իսկ պետություն ղեկավարելու պարա­գայում և հատկապես՝ միջազգային հարաբերություններում, նման գործելակերպը պարզապես մանկամտություն է: Իրական, ռեալ քաղաքականությունը՝ մի կողմից, և ծափա­հարությունների արժանացող բոցաշունչ ճառերն ու կենաց­ները կամ սրտիկներ կորզող ֆեյսբուքյան եթերները տար­բեր, երբեմն նաև՝ տրամագծորեն տարբեր բաներ են: Առաջինը պահանջում է իրավիճակների վրա ազդող գործոննե­րի սթափ, հույզերից զուրկ հաշվարկ:

Այդպիսի հաշվարկնե­րով հանդես է եկել Հայաստանի առաջին նախագահ Լևոն Տեր-Պետրոսյանը 1997 թվականի սեպտեմբերի 26-ի մա­մուլի ասուլիսում, նույն թվականի նոյեմբերի 1-ին հրապա­րակված «Պատերազմ, թե խաղաղություն, լրջանալու պա­հը», հոդվածում, 1998 թվականի հունվարի 8-ի Անվտանգու­թյան խորհրդի ընդլայնված նիստում, ինչպես նաև 2017 թվականի խորհրդարանական ընտրարշավի ժամանակ: Կարելի է տարբեր կերպ վերաբերվել Տեր-Պետրոսյանի ան­ձին, նրա վարած քաղաքականությանը՝ որպես նախագահ, նրա գործունեությանը՝ ընդդիմադիր դաշտում: Բայց ցանկա­ցած չնախապաշարված մարդ, եթե չալարի և կարդա նշածս նյութերը, կտեսնի, որ նրա հաշվարկները ճիշտ էին: Որոշակի հույս ունեմ, որ հիմա էլ Տեր-Պետրոսյանը հան­դես կգա նմանատիպ վերլուծությամբ, որը ցույց կտա այ­սօրվա աղետալի վիճակից դուրս գալու ճանապարհը: Եթե, իհարկե, այդպիսի ճանապարհ կա»,-գրում է թերթը:

Նյութն ամբողջությամբ կարդացեք թերթի այսօրվա համարում: