Նավալնիի շուրջ իրավիճակը չի պահանջում Պուտինի հատուկ ուշադրությունը․ Պեսկով

Ալեքսեյ Նավալնիի գործի շուրջ ստեղծված իրավիճակը և դատավարության շրջանակներում նրա իրավունքների պահպանումը չեն պահանջում Ռուսաստանի նախագահ Վլադիմիր Պուտինի հատուկ ուշադրությունը: Այս մասին երեքշաբթի լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ գործակալությունը:

«Դա այն իրավիճակը չէ, որը նախագահի կողմից հատուկ ուշադրություն է պահանջում»,-ասել է Կրեմլի խոսնակը: Նա ավելացրել է, որ «Ռուսաստանի բոլոր քաղաքացիների իրավունքները երաշխավորված են օրենքներով, Ռուսաստանի վերահսկիչ գերատեսչություններով, և դա կլինի նաև այս պարագայում»:

Պեսկովի խոսքով՝ Նավալնիի կալանավորումը Ռուսաստանի ներքին գործն է, ուստի Մոսկվան ուշադրություն չի դարձնի արտասահմանից այս հարցի վերաբերյալ որևէ հայտարարության վրա: «Մենք լսում ենք այդ հայտարարությունները, բայց այս պարագայում մենք չենք կարող և չենք պատրաստվում հաշվի առնել այդ հայտարարությունները», - ասել է Կրեմլի խոսնակը:

Նա ընդգծել է, որ Նավալնիի դեպքում խոսքը վերաբերում է Ռուսաստանի Դաշնության քաղաքացու կողմից Ռուսաստանի օրենքը խախտելուն: «Դա բացարձակապես ներքին խնդիր է, և մենք ոչ ոքի թույլ չենք տա միջամտել դրան և մտադիր չենք լսել նման հայտարարությունները»,-ասել է Պեսկովը:

Միևնույն ժամանակ, շարունակել է նա, Ռուսաստանը, ինչպես նախկինում, շահագրգռված է (այլ երկրների հետ) լավ հարաբերություններ ունենալ, որոնք ոչ մի կերպ չեն կարող կարգավորվել մեկ առանձին քաղաքացու հարցով:

Մեկնաբանելով Պատժի իրագործման դաշնային ծառայության պնդումները այն մասին, որ Նավալնին չի կատարել փորձաշրջանի ժամկետների պահանջները, Պուտինի մամուլի խոսնակը նշել է, որ որևէ հակասություն չկա այն փաստի հետ, որ Նավալնին բուժվել է Գերմանիայում Ռուսաստանի իշխանությունների թույլտվությամբ:

«Այն ժամանակ, երբ նա բառի ամբողջ իմաստով բեռլինյան հիվանդ էր, ծառայությունը նրան ոչ մի հարց չէր տալիս և այստեղ ցուցաբերում էր բացարձակ ճկունություն և հասկացողություն: Բայց այն բանից հետո, երբ Charite հիվանդանոցը հաստատել էր, որ հիվանդը դադարել է այդպիսին լինել և գտնվում է նորմալ առողջական վիճակում, այդ հարցերը հայտնվել են»,- ասել է Պեսկովը՝ հիշեցնելով, որ հիվանդանոցի հայտարարության մեջ խոսում էր Նավալնիի առողջացման մասին: Երբ նրան խնդրել են մեկնաբանել փաստաբանների պնդումները, որ Նավալնին վերականգնում է անցել Բեռլինի կլինիկայում մինչև հունվար ամիս, Կրեմլի խոսնակը ասել է, որ Նավալնիի պաշտպանական թիմը կկարողանա այդ փաստաթղթերը օգտագործել դատարանում:

Բացատրությունների համար, թե ինչու է Նավալնիի ձերբակալման հարցը որոշվել ոստիկանության բաժնում արտագնա հանդիպման ձևաչափով, Պեսկովը խորհուրդ է տվել դիմել դատարան: «Մենք բոլորս գիտենք, որ անցած մի քանի ամիսների ընթացքում բոլոր դատարանները աշխատում էին կորոնավիրուսի հետ կապված հատուկ ռեժիմով, և այս ռեժիմի ինչ հատկանիշներ կան և ինչպես է գործնականում այն իրականացվում, ավելի լավ է, հարցնեք ուղղակիորեն դատարանում», -ընդգծել է ՌԴ նախագահի մամուլի խոսնակը։

Նախագահի մամուլի քարտուղարը հայտարարել է, որ Նավալնիի «փողոց դուրս գալու» կոչերը կարող են ենթակա լինել օրենքի համապատասխանության ստուգման: «Տագնապալի կոչեր են»,-ասել է Պեսկովը՝ նկատի ունենալով Նավալնիի համապատասխան հայտարարությունները:

«Մենք այն մարմինը չենք, որը կարող է դա գնահատել, բայց, իհարկե, հավանաբար, սա կարող է հիմք հանդիսանալ որոշակի վերլուծության և փորձաքննության` ապօրինի ինչ-որ բան անելու կոչերի թեմայով»,- ասել է նա: Միաժամանակ Պեսկովը շեշտել է, որ Կրեմլը չի վախենում զանգվածային բողոքներից:

Ռուս ընդդիմադիր գործիչ Ալեքսեյ Նավալնին ձերբակալվել է և մինչև փետրվարի 15-ը կգտնվի «Մատրոսկայա տիշինա» դաշնային նշանակության քննչական մեկուսարանի հատուկ բլոկում: