Կորոնավիրուսային բռնկումից մեկ տարի անց. BBC-ին ռեպորտաժ է ներկայացրել համավարակի սկզբնական օջախ Ուհանից (տեսանյութ)
Հեղինակավոր BBC լրատվականի թղթակից Սթիվեն Մքդոնելն այցելել է նոր տեսակի կորոնավիրուսի սկզբնական օջախ՝ չինական Ուհան քաղաք, որտեղ 2020 թվականի հունվարի 23-ին աշխարհում առաջին անգամ կորոնավիրուսով պայմանավորված «լոքդաուն» է հայտարարվել:
Մինչև համավարակի վերածվելը, կորոնավիրուսն առաջինը հայտնաբերվել է հենց այստեղ` 2019 թվականի վերջին: Դրանից հետո քաղաքում սահմանվել է խստագույն կատարատինային ռեժիմ, ինչի հետևանքով Ուհանը, կարելի է ասել, վերածվել է քաղաք-ուրվականի:
Այստեղ արգելափակումները վերացվել են 2020 թվականի ապրիլին: Իսկ մինչ այդ բնակիչները ստիպված են եղել երկու ամիս անցկացնել տանը:
Հուբեյ նահանգում, որի վարչական կենտրոնը Ուհանն է, վերջին յոթ ամիսների ընթացքում համաճարակի նոր դեպքեր չեն գրանցվել, հայտնում է լրատվականը: Այստեղ դիմակներն այլևս պարտադիր չեն և մարդիկ վերադարձել են իրենց աշխատանքին` հաշվի առնելով բարդ տնտեսական պայմանները:
Հուբեյի բնակիչներից մեկը, պատասխանելով լրագրողի հարցին, նշել է, որ լավատեսորեն չի տրամադրված և կարծում է, որ համավարակը վերադառնալու է:
«Տպավորություն է, որ այստեղ իշխանություններն արդեն գիտեն, թե ինչպես պետք է պայքարել կորոնավիրուսային բռնկումների դեմ և դա վստահություն է առաջացնում: Չինաստանը սանձահարել է այն, և, եթե հավատանք քարոզչությանը, ուրիշ ոչ մի տեղ նման հաջողություն չի գրանցվել», - նշում է Մքդոնելը:
Ուհանի բնակիչների կարծիքով՝ այն այժմ աշխարհի ամենաապահով քաղաքն է: