Արտահերթ ընտրություններ անցկացնելու նախաձեռնությունը եւս մանիպուլյացիա է. Սերժ Սրապիոնյան

Մեր երկրի վարչապետն իր լկտի խմբով մեզ 44 օր շարունակ համոզում, ապացուցում էր փաստերով, որ մենք հաղթանակներ ունենք. սա ամբողջ սցենարի մի փոքր հատվածն էր, որ նախ կատարվեց բարոյալքում բանակում, նաեւ մյուս ասպարեզներում, որ մտածված ծրագիրը իրականացվեր՝ այն է՝ Ղարաբաղը տալ թուրքերին: Այս մասին այսօր՝ հունվարի 9-ին, մամուլի ասուլիսի ժամանակ նշեց կինոռեժիսոր Սամվել Թադեւոսյանը:

«Կա մշակույթի գործիչների մի խավ, որի համար ինչ էլ կատարվի երկրի ներսում, իրենք անտեղյակ են, որովհետեւ իրենք իրենց լափաբաժինը կարողանում են ապահովել եւ այս, եւ այն իշխանությունների ներքո, սիրաշահելով նրանց»,-ասաց նա:

Ասւոլիսի բանախոսներից գրականագետ Սերժ Սրապիոնյանն էլ անդրադարձավ արտահերթ ընտրություններ անցկացնելու իշխանությունների պատրաստակամության խնդրին՝ նշելով. «Արտահերթ ընտրություններ անցկացնելու նախաձեռնությունը եւս մանիպուլյացիա է, այդպիսի ընտրությունների մենք արդեն ականատես եղանք, երբ դրանք պետք է տեղի ունենային մայիսին, ափալ-թափալ բերեցին առաջ, օգտվելով թավշի էյֆորիայից եւ եղավ այն, ինչ եղավ: Դուք գիտե՞ք որեւէ երկրի խորհրդարան, որի երկու ընդդիմադիր ուժերը չեն մասնակցում որեւէ քննարկման, իսկ բացարձակ մեծամասնությունը, որը մատի մեկ շարժումով քաջնազարական ենթակա խմբի հոգեբանությամբ վավերացնում է օրենքներ, որոնք պատերազմական վիճակի մեջ գտնվող երկրի համար առնվազն կործանարար են՝ սկսած գույքահարկի ավելացումից, շրջանառու հարկ մտցնելուց:

Սա ինձ իրավունք է տալիս ենթադրելու, որ հայ ժողովրդի թիկունքում ներսում տեղի է ունենում դավադրություն եւ դրան մեծագույն հաճույքով օգնում են մինչեւ այսօր մեզ հարեւան հորջորջված, բայց թշնամաբար պահած առանձին ուժեր»: