ԵՄ 13 երկրների ԱԳ նախարարները կոչ են արել մինչեւ գարուն պատվաստանյութ տրամադրել ԱլԳ երկրներին, այդ թվում Հայաստանին
ԵՄ 13 երկրների արտաքին գործերի նախարարները նամակ են հղել Եվրահանձնաժողովին, որում կոչ են անում մինչեւ գարուն պատվաստանյութ տրամադրել Արեւելյան գործընկերության պետություններին (Հայաստան, Ադրբեջան, Բելառուս, Մոլդովա եւ Ուկրաինա), հաղորդում է ՏԱՍՍ-ը:
«Մենք Եվրահանձնաժողովին կոչ ենք անում աջակցության մեխանիզմ մշակել: Արեւելյան գործընկերության կայանալիք գագաթաժողովի (2021 թվականի առաջին կիսամյակում) նախաշեմին մենք պետք է ուժեղ եւ համակարգված ազդանշան ուղարկենք այդ ծրագրի ռազմավարական կարեւորության մասին: Կորոնավիրուսի դեմ պատվաստանյութի նկատմամբ հեշտացված հասանելիությունը այդ ազդանշանի կարեւոր բաղադրիչը կդառնա: Մենք վստահ ենք, որ այդ գործողությունները բարձր կգնահատվեն այդ պետությունների կառավարությունների եւ քաղաքացիական հանրությունների կողմից»,-ասվում է նամակում, որը ստորագրել են ԵՄ բոլոր արեւելաեվրոպական երկրների, ինչպես նաեւ Շվեդիայի, Դանիայի եւ Ֆինլանդիայի ԱԳՆ ղեկավարները:
Ավելի ուշ ԵՀ-ն հաստատել է, որ ստացել է ԵՄ 13 երկրների ԱԳՆ ղեկավարների նամակը եւ հայտնել, որ կպատասխանի դրան, երբ ժամանակը գա: Այս մասին Բրյուսելում ճեպազրույցի ժամանակ հայտարարել է ԵՀ պաշտոնական ներկայացուցիչ Անա Պիզոնիերոն:
Նա նաեւ հիշեցրել է, որ ԵՄ պատվաստման ռազմավարությունը ներառում է «պատվաստանյութերի հեշտացված փոխանցման կամ վաճառքի հնարավորություն, որը ԵՄ երկրները կստանան ըստ Եվրահանձնաժողովի կողմից ստորագրված պայմանագրերի»: Բնականաբար, դա տեղի կունենա այն բանից հետ, երբ ԵՄ երկրները անհրաժեշտ ծավալի պատվաստանյութ ստանան: