Փաշինյանի հրաժարականը պահանջող քաղաքացիները Բաղրամյան պողոտայից երթով հասան Հանրապետության հրապարակ (Տեսանյութ)
Մի խումբ քաղաքացիներ փակեցին Երևանի Բաղրամյան-Պռոշյան փողոցների խաչմերուկը՝ պահանջելով Նիկոլ Փաշինյանի հրաժարականը։ Քաղաքացիները վանկարկում էին «Առանց Նիկոլ Հայաստան»։
Նրանից մեկը, դիմելով, ոստիկաններին, նշեց, թե երեկ ակտիվիստներին հարվածել են։ «Կոչ եմ անում չանել նման բան, այդ ոստիկանին բարևելու եմ այնպես, ինչպես կբարևի ադրբեջանցի զինվորին՝ «սալամալեյքում»։ Մենք անում ենք ձեզ համար, որովհետև վաղը այս դավաճան Նիկոլը ձեր տներն էլ է ծախելու»,-հայտարարեց նա։
Ոստիկանները ժամանակ տվեցին՝ փողոցը բացելու համար։ «Հայրենիք» կուսակցության անդամ Բաբկեն Հարությունյանը հայտարարեց, թե այն մարդիկ, որոնք սատարում են Փաշինյանի դավաճանությանը, նաև իրենք են պատասխանատու դրա համար։
«Հայրենիք» կուսակցության քաղխորհրդի անդամ Արա Սակակյանն էլ, դիմելով, ոստիկաններին, հարցրեց․ «Ինչն ենք մենք սխալ անում, որ 2018-ի ճանապարհ փակելուց տարբերվում է։ 2018-ին այս մարդիկ նույն ձևով, խաղաղ ճանապարհով, բոլոր հաղորդակցության ուղիները փակելով՝ եկան իշխանության։ Մենք նույն ձևով անում ենք։ Մեզ ասեք՝ ինչն ենք սխալ անում, ինչն է փոխվել»,-ասաց նա՝ հարցնելով՝ արդյո՞ք պետք է համաձայնություն լիներ, կամ օտար երկրից հորդոր լիներ։
«Թե՞ պայմանավորվածություն կար Ղարաբաղը հանձնելու, իրենց իշխանություն տվեցիք։ Մենք ասում ենք՝ պարտված, ձախողված մարդը պետք է հեռանա»,-նշեց նա։
Ոստիկանությունը բերման ենթարկեց ակցիայի մի քանի մասնակիցների։ Այժմ քաղաքացիները երթ են սկսել։