Վրաստանի ԱԳՆ-ը հույս ունի վերսկսել աշխատանքը Ադրբեջանի հետ պետական սահմանի գծանշման ուղղությամբ
Վրաստանի եւ Ադրբեջանի պետական սահմանների սահմանազատման պետական հանձնաժողովի հերթական նիստի ստույգ ամսաթիվը դեռ հայտնի չէ, այսօր ճեպազրույցում ասել է Վրաստանի փոխարտգործնախարար Լաշա Դարսալիան, հաղորդում է «Նովոստի-Գրուզիան»:
Նրա խոսքով՝ ԱԳՆ-ը հույս ունի, որ հանձնաժողովի աշխատանքները կվերսկսվեն առաջիկայում: «Դա պլանավորված էր դեռ մարտ ամսին, եւ հետո այս հանդիպումը հետաձգվում էր գրեթե ամեն ամիս՝ ստեղծված իրավիճակի պատճառով: Վերջին հանդիպմանը մենք պայմանավորվեցինք հնարավորինս շուտ գումարել հանձնաժողովը: Ներկայումս մենք աշխատում ենք որոշակի ամսաթվի վրա, երբ հանդիպումը կարող է տեղի ունենալ, չնայած հուսով ենք, որ առաջիկայում հնարավոր կլինի վերսկսել հանձնաժողովների աշխատանքը»,- ասել է Դարսալիան:
Փոխնախարարը նաեւ մեկնաբանել է Վրաստանի արտգործնախարարի ավելի վաղ արած հայտարարությունն այն մասին, որ վրացական կողմը ձեռք է բերել նոր քարտեզագրական նյութեր, որոնք կարող են կարեւոր դեր ունենալ սահմանազատման գործընթացում, այդ թվում` Դավիթ-Գարեջիի վանական համալիրի տեղակայման հետ կապված, որի մի մասը վիճելի տարածքում է:
Նրա խոսքով, միջազգային փորձագետները, ուսումնասիրելով Դավիթ-Գարեջիի հետ կապված առկա քարտեզներն ու փաստաթղթերը, եկել են այն եզրակացության, որ 1: 200 000 մասշտաբի քարտեզը հաստատում է Վրաստանի պնդումները վանական համալիրի վիճելի տարածքի նկատմամբ:
Միեւնույն ժամանակ, Վրաստանի փոխարտգործնախարարը նշել է, որ միջազգային փորձագետներն ասում են, թե միջազգային իրավունքի տեսակետից այս քարտեզը պետք է դիտարկել ոչ թե առանձին, այլ որպես 1:500 000 մասշտաբի քարտեզի օժանդակ փաստաթուղթ, որը կարող է հիմնված լինել 1:200 000 մասշտաբի քարտեզի վրա, որը ներկայացվել է որպես 1938 թվականի որոշման արձանագրության հավելված:
Վերջին ժամանակներս Վրաստանում նոր աղմուկ է բարձրացել Ադրբեջանի հետ սահմանի գծանշման բանակցությունների շուրջ, որոնք շարունակվում են գրեթե 30 տարի: Վրաստանի գլխավոր դատախազությունը հետաքննություն է սկսել սահմանազատման գործընթացում վրացական տարածքները օտարերկրյա պետությանը ապօրինի փոխանցելու դեպքի առթիվ, մինչդեռ խոսքը վերաբերում է 2007-ի իրադարձություններին: Գործով ներկայումս կալանավորված է երկու քարտեզագիր՝ սահմանազատման հանձնաժողովի նախկին անդամներ՝ Վրաստանի ԱԳՆ աշխատակից Իվերի Մելաշվիլին եւ Վրաստանի ՆԳՆ աշխատակից Նատալյա Իլիչեւան:
Հետաքննությունը պնդում է, որ վրաց-ադրբեջանական սահմանի գծանշման եւ սահմանազատման հանձնաժողովի աշխատանքների համար քարտեզներ կազմելիս ամբաստանյալները չեն օգտագործել 1938-ի քարտեզը, բայց օգտագործել են սխալ գծված 70-ականների քարտեզ, որի արդյունքում Վրաստանը կարող էր կորցնել 3,5 հազար հեկտար 13 հանձնաժողովի կողմից համաձայնեցված տարածքներ, ներառյալ Դավիթ-Գարեջի վանական համալիրի տարածքի մի մասը:
Այս պահին նախնական կալանքի տակ են գտնվում հանձնաժողովի կալանավորված նախկին անդամներ Իվերի Մելաշվիլին եւ Նատալյա Իլիչեւան: Դատախազությունը չի բացառել, որ այս գործով այլ անձինք կալանավորվեն: Ընդդիմադիր կուսակցությունները կարծում են, որ մեղադրանք կարող է առաջադրվել Վրաստանի նախկին նախագահ Միխայիլ Սահակաշվիլիին: