Կոնգրեսը մեծացնում է ճնշումը Թրամփի վարչակազմի վրա՝ սանձելու Թուրքիային և զսպելու հակամարտությունն Ադրբեջանի և Հայաստանի միջև. The National
Թրամփի վարչակազմը մեծացող ճնշումների է ենթարկվում ամերիկացի օրենսդիրների կողմից, որոնք պահանջում են նախագահից օգտագործել իր ազդեցությունը դադարեցնելու համար Ադրբեջանի և Հայաստանի միջև մարտերի վերսկսումը, գրում է The National–ը։
Պարբերականը նշում է, որ ԱՄՆ Ներկայացուցիչների պալատի՝ հետախուզության հարցերով հանձնաժողովի նախագահ Ադամ Շիֆը, ինչպես նաև հայկական հարցերով հանձնաժողովի համանախագահները հոկտեմբերի 1-ին բանաձև են ներկայացրել՝ «դատապարտելով արդբեջանական ագրեսիան՝ ընդդեմ Լեռնային Ղարաբաղի և Թուրքիայի միջամտությունը հակամարտությանը»: Նշվում է, որ բանաձևին աջակցել են 50 դեմոկրատներ և 6 հանրապետականներ:
Աղբյուրը շեշտում է նաև, որ Շիֆը կոչ է արել ճանաչել Լեռնային Ղարաբաղի անկախությունը:
Պարբերականը հայտնում է, որ Սենատի 12 դեմոկրատ անդամներ՝ փոքրամասնության առաջնորդ Չաք Շումերի և արտաքին հարցերով հանձնաժողովի անդամ Բոբ Մենենդեսի ղեկավարությամբ, առանձին նամակ են հղել ԱՄՆ պետքարտուղար Մայք Պոմպեոյին՝ կոչ անելով անհապաղ դադարեցնել ԱՄՆ ռազմական աջակցությունն Ադրբեջանին, ինչպես նաև հորդորելով ԱՄՆ նախագահ Դոնալդ Թրամփին «համոզել Թուրքիային անմիջապես հետ քաշվել հակամարտությունից»:
Աղբյուրը շեշտում է, որ դեմոկրատ կոնգրեսականներից մի քանիսը հանգստյան օրերին մասնակցել են հայերի կազմակերպած բողոքի ցույցերին ԱՄՆ-ում:
«Թրամփի վարչակազմը մեծապես լուռ է մնացել հակամարտության առնչությամբ, և որևէ նշան չկա, թե ներկայիս ճնշումները կփոխեն իրավիճակը»,- եզրափակում է պարբերականը՝ մեջբերելով Մայք Պոմպեոյի խոսքը, որի համաձայն՝ «երրորդ երկրները պետք է զերծ մնան կողմերի միջև հակամարտությանը միջամտելուց»:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 11-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 525 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։