Դիվանագետները պատերազմը չեն կարող կանգնեցնել, պետք է գծվի շփման նոր գիծ. Տարասով

«Հրադադարի վերաբերյալ մեկ պայմանավորվածությամբ պատերազմական գործողությունները Լեռնային Ղարաբաղում չեն դադարի»,-«Առաջին լրատվական»-ի հետ զրույցում նման տեսակետ է հայտնել Հարավային Կովկասի հարցերով ռուսաստանցի քաղաքագետ Ստանիսլավ Տարասովը։

Նրա կարծիքով՝ պետք է գան ռազմական հանձնաժողովներ, որոնք կբաժանեն կողմերին.«Իսկ տվյալ պահին սովորական գործընթաց է, երբ կողմերից ամեն մեկը փորձում է ամրացնել իր դիրքերն ու այդ դիրքերից բանակցություններ վարի։ Մոսկվայում ընդունված որոշումների փաթերը ենթադրում է ոչ միայն հրադադար, այլ նաև վերադարձ գոյություն ունեցող հիմնական թեզերին՝ Մադրիդյան սկզբունքներին։ Զարմանալի ոչինչ չկա»։

Մեր զրուցակիցն ընդգծեց՝ ադրբեջանական կողմը համաձայնվել է սրան, որովհետև բանացկություննեը կընթանան նոր սցենարով.«Ամենայն հավանականությամբ՝ տարածքներ կարգավիճակի դիմաց, այսինքն տարածքներ՝ Ղարաբաղի կարգավիճակի դիմաց։ Իսկ ինչու՞ հիմա պատերազմել այդ տարածքների համար, արյուն թափել, եթե դրանք նոր պայմանավորվածությունների համաձայն կարող են անցնել Ադրբեջանին։ Սա Մինսկի խմբի սցենարն է, ինչպես ասում է ֆրանսիական կողմը՝ անցում է կատարվում նախկին ֆորմատին, բայց բովանդակությունը փոխվում է՝ տարածքներ կարգավիճակի դիմաց ու վերջ։Ինչպես կստացվի գործնականում՝ ես չգիտեմ, բայց հարցն այդպես է դրված»։

Տարասովի կարծիքով՝ մինչև չհայտնվեն կոնկրետ ռազմական հանձնաժողովներ, մարտերը չեն դադարի.«Դիվանագետները չեն կանգնեցնում պատերազմը, հնարավոր է ռուսները ուղարկեն նման հանձնաժողովներ։ Շփման նախկին գիծը չկա, պետք է նորը գծվի, որտե՞ղ կանգ առնել՝ Ջաբրայիլու՞մ, թե այլ վայրում»։

Մեր հաջորդ հարցին՝ արդյոք հակառակորդի կողմից հրադադարի խախտումն անարգանք չէ Ռուսաստանի նկատմամբ, որի միջնորդությամբ ձեռք բերվեց հրադադարի համաձայնագիր, քաղաքագետը պատասխանեց.«Ո՛չ։Սրանք տեխնիկական հարցեր են, Ռուսաստանն ի՞նչ կապ ունի, ցանկացած պատերազմի ժամանակ սա տեղի է ունենալու։Հարցը նման կերպ դնելը կոռեկտ չէ»։

Դիտարկմանը, թե հայկական կողմը չի համաձայնի տարածքներ՝ կարգավիճակի դիմաց սկզբունքին, Տարասովը պատասխանեց.«Պատերազմ է ընթանում, տիկնիկներով խաղալու ժամանակը չէ։ Քաղաքական սխալներ են թույլ տրվել, բայց դրա մասին հիմա չենք խոսի։Այժմ ռեալ պատերազմ է ընթանում, ենթակառուցվածքներ են ոչնչանում, Ստեփանակերտն է ավիրվում»։