««Իմ քայլ»-ից Ամուլսարի հանքի շահագործմանը դեմ խոսող պատգամավոր չենք իմանում». Ամուլսարի շահագործմանը կողմ բնակիչները նամակ հանձնեցին պատգամավորներին՝ խնդրելով թույլ տալ հանքի շահագործումը (տեսանյութ)
Ամուլսարի հանքի շահագործմանը կողմ համայնքների բնակիչները այսօր բողոքի ակցիա էին անում ԱԺ-ի դիմաց, նրանք նաև բաց նամակ հանձնեցին պատգամավորներին: Գնդեվազ գյուղից Հովհաննիսյան Նարեկը նշեց, որ իրենք երկու հարյուր աշխատող են և խնդրում են կառավարությանը, «Իմ քայլի» պատգամավորներին՝ չխանգարեն իրենց։
Նրանք բաց նամակում նշել էին, ոչ իրենց համար անհասկանալի է, թե ինչու են տարբեր պատգամավորներ աջակցում ապօրինություններ իրականացնողներին և համայնքին աջակցելու փոխարեն երկու տարի այցելում և քաջալերում են ապօրինի իրականացնողներին:
Առուստամյան Մխիթարը նշեց, որ «Լուսավոր Հայաստան»-ից Անի Սամսոնյանը, Գևորգ Գորգիսյանը և «Բարգավաճ Հայաստան»-ից Նաիրա Զոհրաբյանը զբաղվում են PR-ով: Ինչ վերաբերում է «Իմ քայլ»-ից այդպիսի պատգամավորներ լինելու հարցին, ապա քաղաքացին ասաց. « «Իմ քայլը»-ից կան պատգամավորներ, որոնք նախկինում բնապահպաններ են աշխատել և իրենք ներկայացնում են իրենց բնապահպանական խնդիրները: Ես «Իմ քայլը»-ից անուններ չեմ տվել, ես չգիտեմ նրանցից դեմ արտահայտվող պատգամավորներ կան, թե ոչ»,-ասաց նա:
Նա նշեց, որ չգիտի թե այս խնդիրը մինչև հիմա ինչու չի լուծվում: «Այստեղ ինքնաբուխ հավաքված ժողովուրդը իրենց քվեն տվել են այս մարդկանց և իրենք էլ Ազգային ժողովում են, կառավարությունում են, մենք նրանցից պահանջում ենք՝ տան հարցին լուծում»,-ասաց նա:
Աժ պատգամավորներին ուղղված բաց նամակն ամբողջությամբ ներկայացնում ենք ստորև․
«Հարգելի օրենսդիրներ,
Ձեզ դիմում են Վայոց ձորի և Սյունիքի մարզերի Ամուլսարի հանքավայրի հարակից համայնքների բնակիչներ։
Ընդամենը երկու տարի առաջ մեր համայնքներում բարեկեցիկ ու արժանապատիվ կյանքի հնարավորություն ունեինք։ Մենք ունեինք աշխատանք, Ամուլսարի շնորհիվ ստեղծվում էին նոր բիզնեսներ, իրականացվում էին սոցիալական ծրագրեր։ Ավելի քան երկու տարի է մենք զրկվել ենք Ամուլսարի տված հնարվորություններից, քանի որ մի խումբ մարդիկ որոշել են իրենց դրսևորել որպես «բնապահպան» ու «գիտնական», հանդես գալով համայնքի անունից, որը չեն ներկայացնում։
Մեզ համար անհասկանալի է, թե ինչու են տարբեր պատգամավորներ աջակցում ապօրինություն իրականացնողներին։ Չէ՞ որ օրենսդիր մարմնի ներկայացուցիչը պետք է պաշտպանի օրենքը։ Մեր համայնքներում հազարավոր բնակիչներ ապօրինի զրկված են աշխատանքից, ապօրինի փակ են Ամուլսարի ճանապարհները։ Համայնքին աջակցելու փոխարեն, որոշ պատգամավորներ՝ թե' իշխանական, թե' ընդդիմադիր երկու տարի պարբերաբար այցելում են ու քաջալերում ապօրինություն անողներին։ Իսկ քանի՞ անգամ են ԱԺ պատգամավորները այցելել իրենց աշխատանքով իրենց տունը պահելու օրինական իրավունքից զրկված այս համայնքների բնակիչներին։
Մենք պահանջոմ ենք օրենսդիր մարմնից կատարել նաև օրենքի պահապանի դերը և միայն քաղաքական շահերով չառաջնորդվել։ Դուք խաղում եք այս համայնքներում հազարավոր մարդկանց ճակատագրերի, այս տարածաշրջանի ապագայի, երկրի հեղինակության հետ։ Ամուլսարը չունի ոչ մի շոշափելի բնապահպանական խնդիր։ Այն վաղուց դարձել է քաղաքական խնդիր ու ոմանց համար քաղաքական էժան դիվիդենտների առիթ։ Կոչ ենք անում սթափվել և կանգնել օրենքի ու այս համայնքների ու երկրի իրական շահի կողքը»։
Տեսանյութը՝ Tert.am-ի: