Կովը՝ սպանության պատճառ. ամբաստանյալի աթոռին նախկին պաշտոնյա է

Սյունիքի մարզի Որոտան համայնքում տեղի ունեցած դանակահարության հետևանքով մահացածի գործով մեղադրյալի կարգավիճակում է Պետական պահպանության գլխավոր վարչության ռազմականացված ջոկատի նախկին պետ Էդվարդ Մարկոսյանը, որը, ըստ հարազատների, կապ չունի այդ սպանության հետ։

NEWS.am-ի հետ զրույցում գործով ամբաստանյալի կինը պատմել է, որ իր ամուսինը շուրջ 2,5 տարի կալանքի տակ է՝ անհիմն ցուցմունքի հիման վրա։

«Այդ ողբերգական դեպքից առաջ Որոտան գյուղում մեր փեսան և այս պահին տուժողի կարգավիճակ ունեցող անձինք վիճաբանություն են ունենում միմյանց հետ, թե ինչու է կովը մտել մեր փեսայի այգին։ Ամուսինս տեսել է, որ վիճաբանում են, հորդորել է, որ վերջ տան։ Նա ասել է, որ պետք չի կովի համար իրար հետ վիճել։ Վիճաբանությունից հետո արդեն սկսվել է ծեծռտուք։ Հետո հանգստացել են ու ամեն մեկն անցել իր գործին։ Ամուսինս էլ գնում է Որոտանից մեկ կիլոմետր հեռավորության վրա գտնվող Արցախյան ազատամարտի հերոս Արայիկ Մարկոսյանի հուշաղբյուրում մաքրություն անելու։ Մեր փեսան տեսնում է այնտեղ ամուսնուս ու առաջարկում կանչել տուժող կողմին ու բարիշել։ Նրանք էլ գալիս են ու մեծ ծեծկռտուք է տեղի ունենում։ Ամուսինս կռվից խույս տալու համար՝ փախչում է դեպքի վայրից։ Փեսան էլ մասնակիցներից մեկին դանակով հարված է հասցնում»,- դեպքի մասին պատմել է գործով ամբաստանյալի կինը։

Նա ասել է, որ իրենց փեսան, երբ իմացել է՝ դանակահարվածը հիվանդանոցում մահացել է, ինքնակամ ներկայացել է ՀՀ ոստիկանություն և ցուցմունք տվել։

Փեսան ձերբակալվում է, այնուհետև կալանավորվում։

«Այդ սպանությունից մեկ շաբաթ անց ամուսնուս են կալանավորում։ Տուժող կողմն էլ սկսում է կեղծ ցուցմունքներ տալ, թե ամուսինս է սպանությունը գործել։ Մահացածի իրավահաջորդներից որդին էլ ցուցմունք է տալիս, թե ինքը տեսել է՝ ամուսինս է դանակահարել իր հորը»,- պատմել է կինը։

Նրա խոսքով՝ ամուսնու խափանման միջոցի փոփոխման համար մի քանի անգամ միջնորդություններ են ներկայացրել դատարան, ինչը, սակայն մերժվել է։

NEWS.am-ի հետ զրույցում գործով ամբաստանյալ Էդվարդ Մարկոսյանի պաշտպան Համլետ Դավթյանն էլ ասել է, որ արդեն դատավարության ավարտին են հասել. դատական վիճաբանությունների փուլում են։

«Անհիմն ցուցմունքի հիման վրա 2,5 տարի կալանքի տակ է։ Չունենալով ռեալ ապացույցներ՝ առաջադրել են նման մեղադրանք»,- ասել է պաշտպանն ու հավելել, որ իր պաշտպանյալը մինչև հիմա չի էլ ընդունել իրեն առաջադրված մեղադրանքը։

«Մինչև հիմա էլ իր փեսան ասում է, որ ինքն է սպանել այդ անձին։ Անգամ դատարանում է հայտարարել, երբ վկայի կարգավիճակում հարցաքննվում էր։ Տուժող կողմն էլ ենթադրում է, թե փեսան իր վրա է վերցնում մեղադրանքը, որ Էդվարդը չդատապարտվի»:

Նշենք, որ Մարկոսյանին մեղադրանք է առաջադրվել ՀՀ ՔՕ 104-րդ հոդվածի 1-ին մասով (սպանություն)։