Տավուշի սահմանամերձ համայնքների երեխաների այցը Դիլիջանի քաղաքային այգի և Verev պարանայգի

Սեպտեմբերի 9-ին «Զբոսաշրջության և քաղաքաշինության» (ՏՈՒՖ) բարեգործական հիմնադրամի կողմից Դիլիջանում մեկնարկեց մի հետաքրքիր նախաձեռնություն, որի շրջանակում Տավուշի սահմանամերձ համայնքների 4-14 տարեկան երեխաներն այցելեցին Դիլիջանի քաղաքային այգի: Այցի շրջանակում երեխաներն անվճար օգտվեցին Verev պարանայգուց, ատրակցիոններից և մանկական խաղահրապարակից: Սահմանամերձ համայնքների դպրոցականների այցը Դիլիջանի քաղաքայի այգի կշարունակվի տարբեր օրերի և տարբեր խմբերով: Այսօր այգում հյուրընկալվել էին մասնավորապես Չինարի համայնքի դպրոցականները:

Նախաձեռնությունն իրականացվում է Տավուշի մարզպետարանի հետ համագործակցությամբ: Կորոնավիրուսային վարակի կանխարգելման նպատակով՝ պահպանվում են անվտանգության բոլոր կանոնները:

Տեղեկացնենք, որ ՏՈՒՖ հիմնադրամի կողմից սա առաջին նմանօրինակ նախաձեռնությունը չէ: Նախկինում (հունիսի 1-ին, տոն օրերին) նույնպես իրականացվել են նման միջոցառումներ, որի շրջանակում Դիլիջանի բնակիչներն ու երեխաներն անվճար օգտվել են Verev պարանայգուց:

Դիլիջանի քաղաքային այգու բարեկարգման ծրագիրն իրականացվում է «Զբոսաշրջության և քաղաքաշինության» (ՏՈՒՖ) բարեգործական հիմնադրամի կողմից, որը 2020 թ. հուլիսից ստանձնել և իրականացնում է «Հայաստանի զարգացման նախաձեռնություններ» (IDeA) հիմնադրամի զբոսաշրջության և քաղաքաշինության զարգացմանը միտված բոլոր ծրագրերը:

Բարեկարգված և արդիականացված քաղաքային այգին դարձել է հետաքրքիր ժամանցի վայր և նոր հանրային տարածք Դիլիջանում՝ նպաստելով քաղաքի զբոսաշրջային գրավչությանը, ստեղծելով սոցիալական ձեռներեցության նոր ձևաչափ, ներգրավելով բազմաթիվ շահագրգիռ կողմերի և զարգացնելով համայնքի ենթակառուցվածքները:

Դիլիջանի Քաղաքային այգու բարեկարգման աշխատանքներն ընթացել են մի քանի փուլով:

Բարեկարգման երկրորդ փուլն իրականցվել է 2020 թ.-ի գարնանը, որի շրջանակում այգու տարածքում ամբողջությամբ պահպանվել են և վերամշակվել կանաչ տարածքները, կառուցվել է բասկետբոլի համար նախատեսված խաղադաշտ և համայնքային տարբեր միջոցառումների համար նախատեսված ամֆիթատրոն, տեղադրվել են թենիսի սեղաններ և բատուտ: Դիլիջանի քաղաքապետարանի թույլտվությամբ և աջակցությամբ այգու տարածքից ապամոնտաժվել են հին և շահագործման համար ոչ պիտանի կառուսելները: Փոխարենը տեղադրվել են նոր ատրակցիոններ:

Քաղաքային այգու տարածքում ս. թ. մայիսից բացվել է նաև Verev պարանայգին, որը հանդիսանում է սոցիալական ձեռներեցության նոր մոդել՝ պահպանելով հանրային կանաչ տարածքները և ստեղծելով նոր միջավայր ակտիվ սպորտաձևերի և էկոտուրիզմի սիրահարների համար: Այն խթանում նաև առողջ ապրելակերպն ու տարբեր սպորտաձևերի նկատմամբ հետաքրքրությունը: Բացումից ի վեր՝ Verev պարանայգին ունեցել է 4000-ից ավելի այցելու:

Այգու բարեկարգման ծրագրի շնորհիվ Դիլիջանում ստեղծվել է 13 մշտական աշխատատեղ: Քաղաքային այգու հասույթը կուղղվի այգու զարգացման հաջորդ փուլերին և համայնքային զարգացման ծրագրերին:

Այգու բարեկարգման առաջին փուլն իրականացվել էր դեռ 2018 թ.-ին, որի ընթացքում վերականգնվել էին երկար տարիներ չխնամված և լքված վիճակում գտնվող այգու ճեմուղիներն ու խաղահրապարակը, տեղադրվել էին նստարաններ ու աղբամաններ, արդիականացվել էր այգու լուսավորությունը։

Այգու բարեկարգման ծրագրում իրենց աջակցությունն ու ներդրումն են ունեցել հիմնադրամի գործընկերներն ու բարերարները, ինչպես նաև հայաստանյան տարբեր կազմակերպություններ, անհատ բարերարներ, մշակույթի և արվեստի կենտրոններ, Դիլիջան համայնքի բնակիչներ: