Իմ որդին ձեռքից հաշմանդամ է, թուրքն իրեն խփել է, կասեք թուրքն ո՞վ է, որ գա իմ արտում խփի, իմ որդուն. Թորիա գյուղի բնակիչների բողոքի ակցիան

Երեկ Ախալքալաքի ոստիկանության շենքի դիմաց Թորիա գյուղի բնակիչները բողոքի ակցիա էին անցկացնում: Ինչպես հայտնում է jnews.ge կայքը, նրանք պահանջում էին ազատ արձակել ձերբակալված երիտասարդներին, որոնց նկատմամբ այսօր դատարանը որպես խափանման միջոց է ընտրել նախնական կալանքը:

Երեկ, օգոստոսի 26-ին, Ախալքալաքի շրջանային դատարանում տեղի է ունեցել Նինոծմինդայի շրջանի Թորիա գյուղի արոտավայրերում տեղի ունեցած ծեծկռտուքի գործով դատական նիստ, որն անցել է օնլայն համակարգով: Բերման ենթարկվածների նկատմամբ կիրառվել է երկամսյա նախնական կալանք:

«Մենք ուզում ենք, որ մեր տղաներին բաց թողեն: Մեզ ասել էին, որ բաց կթողեն, բայց բանից պարզվում է 2 ամիս կալանքի տակ են թողնելու: Մեր պահանջն է, որ ազատ արձակեն երիտասարդներին, որովհետև իրենք անչափահաս երեխայի են պաշտպանել: Խոտհունձի ժամանակ խնդիր է առաջացել, թուրքերը հարձակվել են մեր վրա: Թուրքերն անչափահաս երեխային ծեծել են»,- Jnews-ի հետ զրույցում ասել է բողոքի ակցիայի մասնակիցներից մեկը:

Առավոտվանից մինչև ժամը 15:00-ն Թորիա գյուղի բնակիչները Ախալքալաքի ոստիկանության շենքի դիմաց սպասում էին դատարանի որոշմանը: Ըստ գյուղացիների, Նինոծմինդայի տեղական իշխանություններն իրենց խոստացել են, որ Թորիա գյուղից բերման ենթարկված 3 երիտասարդներին ազատ կարձակեն, սակայն դատարանը կալանավորոելու որոշում է ընդունել:

«Առավոտյան ժամը 9-ից նստած ենք, ոչ մի ոստիկան մեզ չի մոտեցել, ոչինչ չէին ասում, ժամը երեքի կողմերը եկան ասացին, որ մեր տղաներին երկու ամսով կալանավորում են, այսքան բան: Նինոծմինդայի քաղաքապետը մեզ խոստացավ, որ մեր տղաներին 48 ժամ հետո բաց կթողեն, բայց ինչպես տեսնում եք, նրանց ձերբակալեցին»,- ասել է Ախալքալաքի ոստիկանության շենքի դիմաց հավաքվածներից մեկը:

Թորիա գյուղի բնակիչները JNEWS-ի հետ զրույցում ասել են, որ օգոստոսի 23-ի ծեծկռտուքի մասնակիցներն ազատ շրջում են Նինոծմինդայում:

«Ամբողջ շրջանում, բոլորը նշում են, որ թուրքերն իրենց նեղում են: Թող երկու շրջանը ոտքի կանգնի, որ այս խնդրին լուծում տրվի, թե չէ մի գյուղը բան չի փոխի: Ընտրության ժամանակ ասում են, ու՞ր են թորիացիները, դե հիմա թող գան պաշտպանեն: Ավազակապետն ազատ շրջում է Նինոծմինդայում»,- ասում էր բողոքի ակցիայի մասնակիցներից Խաչատուրը:

«Իմ որդին ձեռքից հաշմանդամ է, թուրքն իրեն խփել է, կասեք թուրքն ո՞վ է, որ գա իմ արտում խփի, իմ որդուն: Մեր պապական 100 տարվա հողերը գնացել ենք քաղելու, թուրքն ասում է չպիտի քաղես: Ոստիկանությունը մեզ համոզելով բերեց հասցրեց այստեղ», – նշել է մեկ այլ մասնակից:

Թորիա գյուղի բնակիչներն Ախալքալաքի ոստիկանության շենքի դիմացից հեռացան պայմանով, որ 4-5 օրից տղաներին ազատ կարձակեն, իսկ հակառակ պարագայում թորեացիներն այլ քայլերի կդիմեն:

Հիշեցնենք, որ օգոստոսի 23-ին Նինոծմինդայի շրջանի Թորիա գյուղի բնակիչների և եկվոր ադրբեջանցիների միջև կռիվ է եղել: Բանն այն է, որ եկվորներն իրենց ոչխարներին արածեցրել են գյուղացիներին պատկանող քաղելավայրերում, իսկ գյուղացիները դուրս են քշել անասուններին, որից հետո սկսվել է ծեծկռտուք:

Վրաստանի ներքին գործերի նախարարությունը հետաքննություն է սկսել ՔՕ-ի 126-րդ հոդվածի առաջին պրիմա մասով, բ և գ ենթակետրով, ինչը ենթադրում է բռնություն: Ինչպես նաև ՔՕ-ի 225-րդ հոդվածի երկրորդ մասով, որը նշանակում է խմբակային բռնության կազմակերպում, ղեկավարում և այդ ամենին մասնակցություն: