Մեր վարչակազմը խստագույն դիրքորոշում ունի Ռուսաստանի նկատմամբ․ Պոմպեո

Պետքարտուղար Մայք Պոմպեոն հայտարարել է, որ ինքը եւ իր թիմը նախազգուշացրել են ռուս պաշտոնյաներին «բոլոր սպառնալիքների մասին, որոնք Ռուսաստանը ներկայացնում է ամերիկացիների եւ ԱՄՆ շահերի համար աշխարհի տարբեր մասերում», փոխանցում է AP-ն:

Պոմպեոն, ելույթ ունենալով Սենատի արտաքին հարաբերությունների հանձնաժողովում, նշել է, որ Աֆղանստանում, Լիբիայում, Սիրիայում, Ուկրաինայում եւ այլ երկրներում ամերիկացիների դեմ ուղղված «սպառնալիքները» «վերացվել են»: Նա չի նշել՝ արդյոք ինքը կոնկրետ մեղադրանքներ է ներկայացրել այն ​​մասին, որ Ռուսաստանը վճարել է «Թալիբան»-ի մարտիկներին Աֆղանստանում ամերիկացի զինվորների սպանության համար, սակայն ասել է, որ բանավեճերը կապված էին ամեն տեսակ սպառնալիքների հետ։

Պոմպեոն ասել է, որ սպառնալիքները քննարկել է հիմնականում արտգործնախարար Սերգեյ Լավրովի հետ: «Այո, ես կարող եմ հավաստիացնել ձեզ, որ ամեն անգամ, երբ ես խոսեցում եմ Արտաքին գործերի նախարար Լավրովի հետ, ես բարձրացրել եմ այն բոլոր խնդիրները, որոնք ռիսկի են ենթարկում ցանկացած ամերիկացու»,- ասել է Պոմպեոն: Նա հրաժարվել է հայտնել՝ արդյոք խորհուրդ կտա, որպեսզի ԱՄՆ նախագահ Դոնալդ Թրամփը բարձրացնի այս հարցերը իր ռուս գործընկեր Վլադիմիր Պուտինի հետ զրույցի ընթացքում, սակայն ասել է, որ Ռուսաստանի ղեկավարը շատ լավ հասկանում է ԱՄՆ-ի դիրքորոշումը:

Պոմպեոն հերքել է պնդումներն առ այն, որ ԱՄՆ վարչակազմը մեղմ է վերաբերվում Ռուսաստանին։

«Մեր վարչակազմը խստագույն դիրքորոշում ունի Ռուսաստանի նկատմամբ»,- ասել է Պոմպեոն՝ նշելով բազմաթիվ քայլերը, այդ թվում՝ պատժամիջոցները, որոնք ձեռնարկվել էին «Ռուսաստանի ապատեղեկատվությանը, Մոսկվայի գերակայությանը եվրոպական էներգամատակարարումների նկատմամբ եւ Ուկրաինայում եւ Վրաստանում ագրեսիվ գործողություններին հակազդելու համար»: «Այս վարչակազմը գործել է մեր շահերի եւ մեր ընկերների պաշտպանության համար»,- ասել է նա: