Բրիտանիայում հրապարակել են «Ռուսաստան» երկար սպասված զեկույցը

Բրիտանիայում հրապարակել են «Ռուսաստան» զեկույցը, որին սպասում էին՝ հույս ունենալով դրա մեջ տեսնել բրիտանական ընտրություններին Ռուսաստանի «միջամտության» ապացույցներ: Փաստաթղթում խոսք է գնում 2014 թվականին Բրիտանիայի ներքին քաղաքականությանը միջամտելու Կրեմլի փորձերի մասին, հատկապես՝ Շոտլանդիայի անկախության հանրաքվեի արդյունքների վրա ազդելու փորձերի մասին: Ընդ որում՝ զեկույցի հեղինակները չեն գտել այն բանի ուղղակի ապացույցներ, որ Ռուսաստանը ինչ-որ կերպ փորձել է ազդել բրեքսիթի հանրաքվեի արդյունքների վրա, փոխանցում է BBC-ն:

Տեղեկությունների դեկտեմբերյան արտահոսքերը ենթադրում էին, որ զեկույցում հիշատակվելու են ռուսաստանցի 9 բիզնեսմենների անունները, որոնք պահպանողականների դոնորներն են: Բայց հրապարակված տարբերակում, համենայնդեպս հրապարակային հատվածում, նրանց անունները չկան:

«Ռուսաստանը, հավանաբար, հետախուզության տեսակետից Բրիտանիային համարում է Արեւմուտքում իր գլխավոր թիրախներից մեկը: Եվ չնայած մենք չենք ստանում այն մակարդակի սպառնալիքներ, ինչ Ռուսաստանին սահմանակից երկրները, մեր վկաները ենթադրումմ են, որ «առաջնահերթությունների» ցուցակում մենք անմիջապես ԱՄՆ-ից եւ ՆԱՏՕ-ից հետո ենք: Սա, ամենայն հավանակությամբ, ԱՄՆ-ի հետ մեր սերտ համագործակցության պատճառով է»,- նշված է զեկույցի տեքստում:

Չնայած զեկույցում ոչ մի ազգանուն չկա, դրանում, համենայնդեպս, հղում է մնացել ինչ-որ «ռուսաստանցի օլիգարխների, որոնք մտերիմ են Վլադիմիր Պուտինին եւ հաջողությամբ ինտեգրվել են Բրիտանիայի քաղաքական կյանքին»:

«Ռուսաստանը երբեք չի միջամտել աշխարհի ոչ մի երկրի ընտրական գործընթացներին՝ ո՛չ Միացյալ Նահանգներում, ո՛չ Մեծ Բրիտանիայում, ո՛չ այլ երկրներում: Մենք դա չենք անում ինքներս եւ չենք հանդուրժում, երբ ուրիշ երկրներն են փորձում միջամտել մեր քաղաքական գործերին»,- զեկույցի հրապարակմանը փաստացի զուգահեռ հայտարարել է ՌԴ նախագահի մամուլի քարտուղար Դմիտրի Պեսկովը: