Ոչ մեծ ընկերությունները այժմ կարող են անվճար ինտերնետ-խանութներ ստեղծել Facebook-ում եւ Instagram-ում
Ոչ մեծ ընկերությունները այժմ կարող են անվճար ինտերնետ-խանութներ ստեղծել Facebook-ում եւ Instagram-ում, հայտնել է սոցիալական ցանցը։
Facebook-ի խանութները թույլ կտան օգտատերերին էջեր ստեղծել եւ դրանք իրենց բիզնեսին համապատասխանեցնել, ինչպես նաեւ ընտրել, թե ինչ ապրանք ցուցադրեն։
Ընկերությունը հայտնել է, որ նոր գործառույթը մշակվել է, որպեսզի օգնի փոքր ձեռնարկություններին, որոնք ստիպված են եղել փակվել եւ այժմ դժվարություններ են կրում։
Երեքշաբթի այդ գործառույթը հայտնվել է Facebook-ում եւ Instagram-ում՝ Մեծ Բրիտանիայում եւ Իռլանդիայում։
«Ցանկացած վաճառող, անկախ չափից եւ բյուջեից, կարող է իր բիզնեսը վարել համացանցում եւ շփվել հաճախորդների հետ, որտեղ եւ երբ նրանց հարմար է»,- հայտարարել է սոցցանցը։
Facebook-ը նաեւ հաստատել է, որ ապագայում օգտատերերը կկարողանան նայել ապրանքները եւ գնումներ կատարել հաղորդագրությունների փոխանակման WhatsApp, Messenger եւ Instagram Direct հարթակների միջոցով։
«Ներկայում շատ փոքր ձեռնարկություններ դժվարություններ են կրում, եւ խանութների փակվելու հետ ավելի ու ավելի շատերն են ձգտում իրենց բիզնեսն առցանց անել։ Մեր նպատակն է հնարավորություն տալ յուրաքանչյուրին՝ փոքր բիզնեսի սեփականատիրոջից մինչեւ համաշխարհային բրենդ, օգտագործել մեր հավելվածները հաճախորդների հետ կապի համար։ Հենց այդ պատճառով մենք խանութներ ենք գործարկում Facebook-ում եւ ներդրումներ ենք կատարում մեր հավելվածների գործառույթներում, որոնք ոգեշնչում են մարդկանց գնումներ կատարել եւ հեշտացնում են գնումներն ու վաճառքները ինտերնետում»,- նշել է սոցցանցը։