Արշակ Կարապետյանին երկրորդ անգամ հրավիրելը կապված է նաեւ պարոն Խաչատուրովի չգալու հետ. Անդրանիկ Քոչարյան
Այս պահին շարունակում է մնալ մեկ կարեւոր անձնավորության խնդիրը, որը մինչեւ ամսի 4-ը ժամանակ ունի ապրիլյան քննիչ հանձնաժողովի աշխատանքներին մասնակցելու. դա գեներալ գնդապետ Յուրի Խաչատուրովն է: Այս մասին, այսօր՝ մայիսի 18-ին, ԱԺ-ում Ապրիլյան պատերազմի հանգամանքներն ուսումնասիրող քննիչ հանձնաժողովի նիստից հետո հայտարարեց հանձնաժողովի նախագահ Անդրանիկ Քոչարյանը:
«Բնականաբար, նաեւ պարոն Կարապետյանին երկրորդ անգամ հրավիրելը կապված է նաեւ պարոն Խաչատուրովի չգալու հետ»,-ասաց նա անդրադառնալով նրան, որ այսօր քննիչ հանձնաժողով երկրորդ անգամ հրավիրվել էր 2016 թվականի ապրիլյան իրադարձությունների ժամանակ Զինված ուժերի գլխավոր շտաբի հետախուզության վարչության պետի պաշտոնը զբաղեցրած, այժմ ՀՀ վարչապետ Նիկոլ Փաշինյանի խորհրդական Արշակ Կարապետյանը:
«Մենք այլեւս հրավեր չենք ուղարկելու, ես ձեր միջոցով ասում եմ եւ պարոն Խաչատուրովը գիտի, որ պետք է գա: Ոչ միայն ինքը գիտի, այլ նաեւ իր ընտանիքի անդամները, ընկերները, մարտական ընկերները, որոնք եղել են հանձնաժողովում: Իրենք էլ գտնում են, որ ճիշտ կլիներ, որ Խաչատուրովը մասնակցեր հանձնաժողովի աշխատանքներին, առավել եւս, որ ինքը անկաշկանդ «5-րդ ալիքի» պատրաստած ֆիլմում պատմում է դրվագներ, նույն դրվագները գար հանձնաժողովում պատմեր, որ եթե մեզ մոտ հարցեր լինեին, տայինք, իսկ ես կարծում եմ՝ այդ ֆիլմից հետո մեզ մոտ ավելի շատ հարցեր են առաջացել»,-ասաց նա: