Թրամփն արձագանքել է Օբամայի քննադատությանն ու մեղադրել նրան ոչ կոմպետենտության մեջ

Կիրակի ԱՄՆ նախագահ Դոնալդ Թրամփը՝ ի պատասխան ԱՄՆ նախկին նախագահ Բարաք Օբամայի՝ ներկայիս վարչակազմի հասցեին հնչեցրած քննադատության, մեղադրել է նրան ոչ կոմպետենտության մեջ, հաղորդում է ՏԱՍՍ-ը։

Շաբաթ Օբաման տեսաուղերձ էր հղել ամերիկյան 78 քոլեջների եւ համալսարանների շրջանավարտներին։ Մասնավորապես, Սպիտակ տան նախկին ղեկավարը հայտարարել է, որ կորոնավիրուսի պանդեմիան ցույց է տվել, որ ԱՄՆ ներկայիս ղեկավարությունը չի գիտակցում՝ ինչ է անում։

«Լսեք, նա ոչ կոմպետենտ նախագահ էր։ Դա ամենն է, ինչ ես կարող եմ ասել։ Չափազանց ոչ կոմպետենտ էր»,-ասել է Թրամփը։ Ընդ որում՝ նախագահը նշել է, որ չի տեսել Օբամայի ելույթը։

2017 թվականի հունվարին նախագահական լիազորությունների ժամկետը սպառվելուց հետո դեմոկրատ Օբաման ընդհանուր առմամբ խուսափում էր հրապարակավ քննադատել իր հետնորդի որոշումները։ Բացառություն էր Սպիտակ տան ծրագիրը, որը կոչված էր դադարեցնել կորոնավիրուսի տարածումը, իսկ տարածման թվով երկիրը զբաղեցնում է աշխարհում առաջին հորիզոնականը։

The Washington Post թերթը, հղում անելով Ամերիկայի առաջնորդի խորհրդականների շրջանում աղբյուրներին, անցած շաբաթ հաղորդել էր, որ Թրամփն իրականում մտահոգված է, որ կորոնավիրուսի երկրորդ բռնկումը, որն սպասվում է աշնանը, կարող է լրջորեն վնասել իր հեղինակոնւթյանը եւ խոչընդոտել նոյեմբերին կայանալիք ընտրությունների արդյունքում նրա՝ վերընտրվելու հնարավորություններին։ Թերթը նշում է, որ Թրամփը փորձում է հասկանալ՝ ինչպես ամեն ինչ հանկարծակի փոխվեց․ նա վստահ էր, որ վերընտրվելու է, այժմ հասկանում է, որ պարտվում է Ջո Բայդենին, որը ներկայում նախագահի ամենահավանական թեկնածուն է Դեմոկրատական կուսակցության կողմից, իսկ հարցումները ցույց են տալիս, որ նա առաջ է անցել Թրամփից նախընտրական մրցավազքում։

Բայդենն այժմ միակ թեկնածուն է, որը կառաջադրվի դեմոկրատների կողմից ԱՄՆ նախագահի պաշտոնը ստանձնելու պայքարում, երբ ապրիլի 8-ին Բերնի Սանդերսը հեռացել էր նախընտրական պայքարից։ ԱՄՆ նախագահական ընտրությունները նախատեսված է անցկացնել նոյեմբերի 3-ին։