Փանիկի 60–70 տոկոսն արտագնա աշխատանքի էր մեկնում, բայց այսօր տանը նստած ենք. գյուղացին ահազանգում է

Ամբողջ համայնքի 60–70 տոկոսն արտագնա աշխատաքնի էր մեկնում, բայց այսօր տանը նստած ենք։ Այս մաիսն NEWS.am-ի հետ զրույցում ասել է Շիրակի մարզի Փանիկ գյուղի բնակիչ Սերոբ Սալնազարյանը։

«36 տարեկան եմ, ընտանիքում ես եմ, կինս և 2 երեխաներս՝ 9 և 12 տարեկան։ 22 տարեկանից արտագնա աշխատանքի եմ մեկնել, այլ աշխատանք չեմ ունեցել։ Ամեն տարի մարտ ամսին գնում էի, նոյեմբերին հետ գալիս, այդ ընթացքում ամեն ամիս գումար էի ուղարկում, նորմալ ապրում էինք, բայց հիմա սահմանները փակել են, ահավոր վիճակ է,– ասել է նա։

Սալնազարյանի խոսքով՝ պետությունից երբեք որևէ աջակցոյություն չի խնդրել, բայց այսօր կանգնած են խդնրի առաջ, աշխատանք չկա. «Հայրս ու մայրս ապրում են մյուս եղբորս հետ, իրենց ընտանիքում էլ 6 հոգի են։ Ներկա պահին միայն հայրս է աշխատում, ամիսը 150 հազար դրամ աշխատավարձ է ստանում, ստիպված մի քիչ իրենից եմ պարտքով փող վերցնում, որ յոլա գնանք, կոմունալները վճարենք, մինչև տեսնենք ինչ ենք անում։ Կառավարությունը հարց չի բարձրացնում, թե այս մարդիկ, որոնք արտագնա աշխատանքի էին մեկնում, ինչպե՞ս պետք է ապրեն։ Նիկոլ Փաշինյանն իր հարցուպատասխանի ժամանակ ասում է՝ գյուղտնտեսական վարկեր վերցնեն, բայց ինձ վարկ չեն տալիս, ես վարկային պատմություն չունեմ, ասում են՝ չի հասնում. դուք այս երկրից չեք, մարդ չեք, չգիտեմ մի խոսքով»։

Նրա խոսքով, եթե անգամ գյուղատնտեսական վարկ տրամադրեին, իրենց մոտ դժվար է զբաղվել գյուղատնտեսությամբ, քանի որ ոռոգման ջրի խնդիր կա. «Այս գյուղում ոռոգման ջուր չկա ընդհանրապես, իմ նմանները կանգնած են փաստի առաջ, որ անգամ մեկ մեշոկ պարարատանյութ չենք կարողանում գնել։ Մենք ամեն տարի միլիարդավոր դոլարների արտարժույթ ենք ուղարկել Հայաստան և այդ փողերով ամբողջ հանրապետության համար ենք հարց լուծել։ Նպաստ էլ չենք ստանում, որ գոնե ասեմ հա, մի բան պետությունն արել է։ Մի քանի տարի առաջ դիմեցինք նպաստի համար, պատասխանեցին՝ դուք բարեկեցիք եք, ձեզ բան չի հասնում։ Իմ սեփական քրտինքով դրսում գումար եմ աշխատել, բերել տուն եմ կառուցել, գրանցել, ասում են՝ քեզ ոչ մի բան չի հասնում։ Այս ամենն անցողիկ է, մեկ անգամ ևս խնդրում եմ, որպեսզի կառավարությունը վերանայի մեր կարգավիճակում գտնվողների հարցը»։