Մենք կորցրել ենք 400 հեկտարից էլ քիչ տարածք․ Ս. Սարգսյանի լայնածավալ հարցազրույցը «5-րդ ալիքի» գործադիր տնօրեն Հարություն Հարությունյանի «Հաղթանակի ապրիլ» վավերագրական ֆիլմում

Ադրբեջանը միանգամից շատ տարածքներ գրավելու հույս ուներ, ինչից հետո, ըստ իրենց տրամաբանության, ես պետք է վերցնեի հեռախոսն ու համանախագահներին խնդրեի փրկել մեզ ադրբեջանցիներից: Այս մասին՝ «5-րդ ալիքի» գործադիր տնօրեն Հարություն Հարությունյանի «Հաղթանակի ապրիլ» վավերագրական ֆիլմում պատմել է Հայաստանի 3-րդ նախագահ Սերժ Սարգսյանը։

«Եվ բնական է, որ այդ պարագայում մենք արդեն բանակցային գործընթացում ամբողջովին տանուլ տված կլինեինք, բայց, ինչպես տեսանք, մեր Զինված ուժերը կարողացան կատարել իրենց հիմնական խնդիրը»,- ասել է նախկին նախագահը:

Սերժ Սարգսյանը հիշել է, որ այդ օրերին ինքը գտնվում էր ԱՄՆ-ում եւ մասնակցում էր Ատոմային անվտանգության գագաթնաժողովին։ Գագաթնաժողովի ընթացքում հանդիպումներ է ունեցել ԱՄՆ փոխնախագահ Բայդենի և պետքարտուղար Քերրիի հետ, քննարկել Լեռնային Ղարաբաղի խնդիրը։ Գագաթնաժողովի ավարտից հետո զանգահարել է Լեռնային Ղարաբաղի նախագահ Բակո Սահակյանին՝ նրան տեղեկացնելով բանակցությունների ընթացքի մասին, - պատմել է Սերժ Սարգսյանը։ Բակո Սահակյանը նշել է, որ մշտապես իրենց տեղեկացրել են բանակցությունների ընթացքի մասին, իսկ ապրիլյան պատերազմը սկսվել է այդ խոսակցությունից ժամեր անց։

«Ցավոք սրտի, շատ լրատվամիջոցներ, անհատներ, որոնք սնվում էին տարբեր գրանտներով, սկսեցին այդ ռազմական գործողությունները ներկայացնել որպես պարտություն: Ինձ համար շատ ցավալի էր, որովհետև իրականության մեջ այդպիսի բան չկար»,- ասել է ՀՀ երրորդ նախագահը:

Անդրադառնալով 800 հա տարածքին` Սերժ Սարգսյանը հիշել է, որ տարածքների կորստի մասին առաջինն ինքն է խոսել Վիեննայից վերադարձի ճանապարհին:

«Անկեղծորեն պետք է խոստովանեմ, որ դրա համար չեմ ափսոսում: Այո, ես ասել եմ ավելի մեծ թիվ, քան իրականությունն է: Ես ինչո՞ւ եմ այդպես ասել: Եթե հիշում եք, մարտական գործողությունների օրերին, այսպես ասած, մերոնցից շատերն օգտվում էին ադրբեջանական լրատվամիջոցներից և խոսում էին այն մասին, որ Թալիշը գրավել են ադրբեջանցիները: Նրանք արդեն Մատաղիսում են և այլն: Իսկ մարտական գործողություններից հետո տարբեր թվեր էին ասում` 5000 հա, 50 ք/կմ և այլն: Նույնիսկ ոմանք ինչ-որ նկարահանումներ էին ցուցադրում, ինչ-որ հաշվարկներ էին անում, և դրանից հետո էլ նրանք գնացել են, փորձել են չափել և տեսել են, որ իմ ասածը շատ ավելին է, քան իրականության մեջ մենք կորցրել ենք: Եթե ուզում եք իրականությունն իմանալ՝ սանտիմետր առ սանտիմետր, ապա դա 400 հեկտարից էլ քիչ էր»,- ասել է Սերժ Սարգսյանը:

«Գերմանիայի կանցլեր Անգելա Մերկելի հետ ապրիլի 6-ի ասուլիսի ժամանակ ինձ հարց տվեցին զենքերի մասին: Ես ասել եմ, որ մեր զինվորները կռվում էին 80-ականների զենքով, ինչը դարձավ շահարկման առարկա»,- պատմել է Հայաստանի 3-րդ նախագահ Սերժ Սարգսյանը:

«Դա դարձավ շահարկման առարկա, բայց այդ մարդկանց հետաքրքիր չէր, թե ես ինչու եմ այդպես ասել: Նպատակը շատ պարզ էր: Ես դիմում էի միջազգային հանրությանը և ասում էի` չնայած դուք աչք եք փակել Ադրբեջանի` մինչև ատամները սպառազինվելու վրա, որ նրանք միլիարդներ են ծախսել, այնուհանդերձ, մեր զինվորների տոկունությունը և մասնագիտական ունակությունները գերազանցում են հակառակորդին, և մերոնք կատարեցին իրենց պարտականությունները»,- ասել է Սերժ Սարգսյանը՝ հավելելով, որ այդ մարդիկ չգիտեն, որ 80-ականների զենք չի նշանակում հին զենք:

ՀՀ 3-րդ նախագահը այդ մարդկանց հորդորել է դիմել ռազմական փորձագետներին, որոնք կհաստատեն իր խոսքերը: