Նրանք, ովքեր գնացել էին Գյուլբենկյան, կարող են հետ գալ Դավիթաշենի «Երեւան Սիթի». Փաշինյանը լուսանկար հրապարակեց

ՀՀ վարչապետ Նիկոլ Փաշինյանը համոզված է, որ ճիշտ որոշում է կայացվել՝ ՁԻԱՀ կենտրոնը միացնել Նոր Նորքի ինֆեկցիոն  հիվանդանոցին: Այս մասին այսօր` մարտի 16-ին, ԱԺ-ում ասաց նա` արձագանքելով ԱԺ «Լուսավոր Հայաստան» խմբակցության պատգամավոր Աննա Կոստանյանի դիտարկմանը, թե արդյոք ճիշտ էր այս երկու բժշկական կենտրոնների միացումը:

«Մեր երկրում պետք է տնօրենի, տնօրենի տեղակալի, տնօրենի տեղակալի օգնականի, գլխավոր հաշվապահի,  գլխավոր խորհրդականի հաստիքները քիչ լինեն եւ  հիվանդների եւ մարդկանց հետ աշխատող մասնագետների հաստիքները շատ լինեն: Այդ որոշումը սրա մասին է եւ ես համոզված եմ, որ ճիշտ որոշում է կայացվել»,-ասաց նա` նշելով, որ ՁԻԱՀ–ի կենտրոնի տեխնիկան նույն տեղում է մնալու։

Անդրադառնալով սուպերմարկետներում հերթերի գոյացմանը Փաշինյանը անընդհատ նկարներ էր հրապարակում, որոնք իրեն էին ուղարկում, եւ որոնցում երեւում էր, որ սուպերմարկետներում հերթեր չկան:

«Սիփան Փաշինյանը ինձ նկար է ուղարկել, հա, թաղապե՞տն է ուղարկել, ուրեմն լեփ լեցուն խանութ է եւ համարյա մարդ չկա խանութում: Այսինքն նրանք, ովքեր գնացել էին Գյուլբենկյան, կարող են հետ գալ Դավիթաշենի «Երեւան Սիթի»»,- ասաց նա:

Նշենք, որ այսօր ավելի վաղ Կառավարությունն արտահերթ նիստում որոշում է կայացրել ՀՀ տարածքում արտակարգ դրություն հայտարարել:

Այս պահին էլ Հայաստանի Ազգային ժողովը հատուկ նիստ է հրավիրել՝ քննարկելու արտակարգ դրություն հայտարարելու կառավարության որոշումը:

Նշենք, որ այս պահին Հայաստանում պաշտոնապես հաստատվել է կորոնավիրուսով վարակվածության 45 դեպք: