Նյու Յորք նահանգում արգելված են 500-ից ավելի մարդու մասնակցությամբ հավաքները, փակ են թանգարաններն ու թատրոնները

Նյու Յորք նահանգում արգելված են 500-ից ավելի մարդու մասնակցությամբ հավաքները: Նահանգապետ Էնդրյու Կուոմոն հայտնել է, որ արգելքը ուժի մեջ է մտնում ուրբաթ 17:00-ից, փոխանցում է AP-ն:

Նյու Յորքում Բրոդվեյի բոլոր թատրոնները փակ կլինեն մինչեւ ապրիլի 12-ը: Ժամանակավորապես փակվում են նաեւ մշակութային հաստատությունները, այդ թվում՝ արվեստների թանգարան Մետրոպոլիտենը, ինչպես նաեւ Մետրոպոլիտեն օպերան եւ Քարնեգի հոլը:

Դրանից բացի, 258-ամյա ամբողջ պատմության մեջ առաջին անգամ հետաձգվել է Նյու Յորքում Սուրբ Պատրիկի օրվան նվիրված շքերթը: Նյու Յորքի քաղաքապետ Բիլ դե Բլազիոն իր թվիթերյան էջում նշել է, որ շքերթը տեղի կունենա ավելի ուշ ՝ «լինի դա ամռան բարձրակետին, թե աշնանային պարզ օր»:

Նյու Յորքի եպիսկոպոսարանը հայտարարել է, որ երկուշաբթի փակելու է իր համակարգում եղած տարրական դպրոցները, համենայնդեպս՝ մեկ շաբաթով:

Դե Բլազիոն հայտարարել է, որ Բրոնքսում 2 պետական դպրոցներ 24 ժամով փակվելու են, քանի որ աշակերտներից մեկի մոտ COVID-19-ի դրական արդյունք է եղել: Բայց նա արմատական միջոցներից խուսափելու հույս ունի՝ ինչպիսին է քաղաքի պետական դպրոցների ամբողջ համակարգի կամ մետրոյի փակումը:

Կուոմոն ասել է, որ քաղաքում գրանցվել է COVID-19-ի 95 հաստատված դեպք: Նահանգում՝ ավելի քան 320 դեպք, ընդ որում՝ ամենամեծ խումբը Նյու Յորքից հյուսիս Նյու Ռոշել արվարձանում է: