Ողբերգական վթար Դիլիջանի ոլորաններում. Mercedes GL-ն բախվել է ծառերի. 31-ամյա կնոջ դին մեքենայից դուրս են գտել (Տեսանյութ և լուսանկարներ)

Տավուշի մարզում, այսօր՝ փետրվարի 27-ին, ողբերգական ավտովթար է տեղի ունեցել. ժամը 03։10-ի սահմաններում Հրազդան քաղաքի բնակիչ՝ 36-ամյա Արտակ Հ-ն իր վարած Mercedes GL մակնիշի A193 AE 198 RUS համարանիշի ավտոմեքենայով Երեւան-Սեւան-Իջեւան ավտոճանապարհի 86-րդ կմ-ում՝ Դիլիջանի ոլորաններում, 3-րդ ոլորանից դեռեւս անհայտ հանգամանքներում դուրս է եկել երթեւեկելի գոտուց եւ մոտ 20 մետր ծառերին բախվելով՝ հայտնվել ոլորանի 4-րդ հատվածում։

Shamshyan.com-ի հաղորդմամբ, վթարի հետեւանքով ուղեւոր՝ Երեւանի բնակիչ, 31-ամյա Կարինե Կ-ն տեղում մահացել է։ Նրա դին ավտոմեքենայից դուրս հայտնաբերել են օպերատիվորեն դեպքի վայր ժամանած ԱԻՆ Փրկարար ծառայության Տավուշի մարզային փրկարարական վարչության Դիլիջանի հրշեջ-փրկարարները։

Օպերատիվ են գործել նաեւ Դիլիջանի հիվանդանոցի բժիշկները, ովքեր տեղում նաեւ օգնություն են ցուցաբերել վարորդին։

Ավտոմեքենան քննիչի հանձնարարականով քարշակի միջոցով տեղափոխվեց ոստիկանության Դիլիջանի բաժնի պահպանվող հատուկ տարածք։ Դեպքի վայրում հավաքված մի քանի քաղաքացիներ էլ ասում էին, որ արդեն որերորդ ավտովթարն է նշված վտանգավոր ոլորանահատվածում տեղի ունենում, ցավոք, նաեւ՝ ողբերգական. «Ամեն անգամ նման դեպքերից հետո պատասխանատու մարմինները ժամանում են, նայում են ու խոստանում, որ թերությունը կվերացվի, բայց այդ ամենը հերթական այցելությունն է լինում։ Գոնե այս հերթական ողբերգական վթարից հետո տեղներից իրար գան ու էս խնդիրը վերջնականապես լուծեն, հակառակ դեպքում ամեն մի մահ, ամեն մի վթար մնալու է դրանց խղճին»։