Հայաստանում պետական գնումների համակարգն անհրաժեշտ է համապատասխանեցնել ժամանակի պահանջներին. ֆիննախ
Հայաստանում պետական գնումների համակարգն անհրաժեշտ է համապատասխանեցնել ժամանակի պահանջներին: Այս մասին այսօր Ազգային ժողովում «Պետական գնումների համակարգի հիմնախնդիրները եւ դրանց լուծման ուղիները» թեմայով լսումների ժամանակ հայտարարեց ֆինանսների նախարար Ատոմ Ջանջուղազյանը:
Նրա խոսքով՝ օրենսդրական կարգավորումների տեսանկյունից խնդիրներ չեն առաջանա:
«Խնդիրներն առաջանում են ենթաօրենքների ակտերի կիրառման ժամանակ, որոնք մշակվում եւ հաստատվում են երկրի կառավարության կողմից: Նոր կարգավորումների մշակման ժամանակ հաշվի է առնվել ոչ թե հայրենական, այլ միջազգային պրակտիկան: Այդ պրակտիկայից ելնելով՝ կառավարությունը մի շարք նորարարություններ է մշակել, որոնց շնորհիվ պետական գնումների պրոցեսում կարող է ներգրավվել փոքր եւ միջին բիզնեսը»,- ասաց նախարարը:
Ջանջուղազյանը նշեց, որ այժմ դժվար է խուսափել շահերի բախումից, եւ փոքր եւ միջին բիզնեսի ներգրավումը կարող է որոշակի առումով լուծել խնդիրը պետական գնումների համար տենդերների անցկացման ժամանակ:
Ջանջուղազյանի խոսքով՝ ծրագրվում է բացառել այնպիսի հասկացություն, ինչպիսին է «ապրանքի կամ ծառայությունների ինքնարժեք», այն փոխարինելով «բանակցային պրոցես» հասկացությամբ, որի ընթացքում փոխզիջում ձեռք կբերվի:
«Բացի այդ, նոր կարգավորումները նախատեսում են գրավի նոր տեսակի կիրառում: Այժմ գրավային ապահովմամբ հանդես են գալիս ապրանքների եւ ծառայությունների մատակարարի կանխիկ ֆինանսական ռեսուրսները: Այժմ գրավ կարող է դառնալ Պետական գանձարանում հաշիվը»,- նշեց նախարարը:
Նա նաեւ հայտնեց, որ գնումների պրոցեսի թափանցիկության ապահովման նպատակով ծրագրային ապահովման նոր համակարգ է մշակվում:
Եթե խոսվում է գնումների վերաբերյալ օրենսդրությունն ամբողջությամբ փոխելու մասին, ապա պետք է սեղանին դրվի այն առաջարկների փաթեթը, որը ցույց կտա, թե ինչն ենք ուզում փոխել եւ ինչով: Ատոմ Ջանջուղազյանի խոսքով, գնումների օրենսդրությունն ամբողջությամբ փոխելու առաջարկ իրենք չեն ստացել. «Մենք շրջանառության մեջ ենք դրել մի նախագիծ, որի վերաբերյալ ստացել ենք առաջարկներ թե հանրային սեկտորի ներկայացուցիչներից, թե պետական կառավարման մարմիններից, թե հասարակական կազմակերպություններից: Կամփոփենք, կներկայացնենք քննարկման եւ արոշումներ կկայացնենք: Այնպես որ մենք ամենեւին հակված չենք կատեգորիկ հայտարարել, որ այն, ինչ ունենք, կատարյալ է եւ ոչ մի բան պետք չի փոխել: Ճիշտ հակառակը՝ մենք փորձում ենք ձեռքներս պուլսի վրա պահել, որպեսզի համարժեքորեն արձագանքեքնք այն ազդակներին, որ ստանում ենք միջավայրից եւ ըստ դրա լավագույնը դարձնենք մեր գնումների համակարագի կարգավորումները»,-ասաց նախարարը:
Դիտարկմանը, որ վարչապետ Նիկոլ Փաշինյանը հայտարարում է, որ մարդկանց կյանքը լավացել է, տնտեսական առաջընթաց ենք ունեցել եւ որպես օրինակ նշում, որ 50 եվրոյով մարդիկ կարող են մեկնել Հռով, Ջանջուղազյանն արձագանքեց. «Շատ օրինաչափ է, որ մարդիկ տարբեր տեսակետներ են հայտնում: Չի կարող այնպես լինել, որ որեւէ իրադարձության, երեւույթի վերաբերյալ լիներ համատարած մեկ միասնական ընկալում:
Հիմա եթե հարցն այն է, թե արդյոք 50 եվրոյով Հռոմ գնալը հնարավորություն է, թե ոչ, ապա միանշանակ հնարավորություն է: Արդյոք դա հնարավորություն է փոխել նաեւ ինչ-որ տեղ աշխարհընկալումը, աշխարհայացքը, արժեքային համակարգի վերաբերյալ մտորումներ ունենալ, վերցնել այն, ինչը լավն է, տեսնել այլ ստանդարտներ, որոնցով մարդիկ ապրում են եւ ձգտել դրան, թե ոչ, սա հնարավորությո՞ւն է, թե՞ ոչ: համոզված եմ, որ հնարավորություն է»: