Երեկ դատախազն ասաց՝ նայի հա, նենց խափանման միջոց կկիրառես, որ հանկարծ երկրից չգնա. Մանվել Գրիգորյանի պաշտպան

ՈԿՄ նախկին նախագահ, գեներալ Մանվել Գրիգորյանի միջնորդության քննարկումն ուշացած էր, սակայն իրավաչափ ու տեղին էր։ Այս մասին այսօր՝ հունվարի 16-ին, լրագրողների հետ հանդիպմանն ասաց Գրիգորյանի պաշտպան Լեւոն Բաղդասարյանը։

«Միջգերատեսչական փորձագիտական հանձնաժողովի եզրակացությունից հետո պաշտպանական կողմը բարձրաձայնեց, ասաց՝ չենք հավատում այդ հանձնաժողովի եզրակացությանը, որովհետեւ հակասական է։ Միջգերատեսչական հանձնաժողովը երբեւիցե չի ասում ներկա պահին Կառավարության որոշման տակ չի ընկնում։ Ամիսներ առաջ իրեն ապահովագրելով՝ այդ հանձնաժողովը փաստեց, որ կյանքին կարող է վտանգ սպառնալ եւ փաստեց, որ կալանքը կրելու ընթացքում հիվանդությունները ծանրացել են։ Պաշտպանական կողմն ասաց, որ քրեական դատավարության օրենսգրքով եւս նախատեսված է հանձնաժողովի եզրակացությունից հետո ասացինք՝ հրավիրի հանձնաժողովի նախագահին եւ անդամներին, հարցեր ունենք տալու։ Դատարանն ասաց՝ այս պահին չեմ կանչում, կգա ժամանակը, կկանչեմ։ Պարզ եղավ հանձնաժողովի եւ դատարանի կաշկանդվածությունը։ Մենք այնքան բարձրաձայնեցինք, որ Գրիգորյանի կյանքին իրական վտանգ է սպառնալու։ Դատախազությունը ցույց տվեց՝ ինչքան է հետամուտ լինում անձի հետ կապված գործառույթներին, որ հենց իմանալով՝ խնդիր կա, մտավ մի հատ ճտցրեց եւ դատարանը վռազ նիստ նշանակեց։ Երեկ դատախազն ասաց՝ նայի հա, նենց խափանման միջոց կկիրառես, որ հանկարծ երկրից չլքի»,- ասաց պաշտպանը։

Պաշտպանն ասաց, որ ամիսներ առաջ պրոֆեսոր Նորբերտ Ավետյանը հայտարարել էր, որ այդպիսի դիսբալանսով Գրիգորյանը սրտի հետ կապված խնդիր է ունենալու. «Մենք կրկին բարձրաձայնեցինք, սակայն ոչ ոք բանի տեղ դրեց։ Բժիշկը գրում է, եթե Ֆրանսիայում այս կարգով նայենք մեր հիվանդներին, ապա մեզ կդատապարտեին։ Դատախազությունը հրապարակեց նրա համար, որ կրկին բացասական կարծիք ձեւավորի եւ հանրություն կրկին դնի քննարկի։ Ֆեյսբուքյան օգտատերերից մեկն ասում է՝ հավաքվեք, ո՞վ են դառել էդ դատավորները»։

Դիտարկմանը, որ Մանվել Գրիգորյանին կալանքից ազատելով որեւէ բան, ըստ էության, չի փոխվել, նա եթե կալանքի տակ էլ լիներ, մնալու էր վերակենդանացման բաժանմունքում, պաշտպանն ասաց. «Միջնորդության քննարկումն ուշացած էր, սակայն իրավաչափ ու տեղին էր։ Բայց օրինակ՝ բժիշկ էին հրավիրում, խոչընդոտ էր լինում ներս մտնելու կամ բժիշկը գալիս էր, եթե ցանկանումէր զանգել օրինակ իր գործընկերոջը՝ կոնսուլտացիայի համար, չէր թույլատրվում։ Գրիգորյանն այն մարդը չէ, որ գնա ու չգա, նրան այնպիսի մեղադրանք է մեղսագրված, որ դրա պատասխանն ուղղակի պիտի տրվի։ Գրիգորյանը երկնքից չի իջել, որ ոտքերն էլ ամպոտ էին, նա այն անձն է, որը կրողն էր նախորդ իշխանությունների։ Փաստ է, որ 10 տարի առաջ հրապարակը գոռում էր՝ Մանվել, Մանվել, այսօր բացասական է գոռում. ոչ ոք չունի այն երաշխիքը, որ մի քանի տարի հետո ուրիշ բան չեն գոռա։ Չեմ ցանկանա անձնավորել, թեպետ կրողը բուրգի գլխին կանգնած ղեկավարն է։ Այսօր մարդիկ չեն աշխատում պետական համակարգում, նրանց պետք է տալ հնարավորություն ինքնուրույն որոշումներ կայացնելու։ Դուք լո՞ւրջ ընդունեցիք, որ երեկ դատախազը որ ասաց՝ հենց ստացել եմ, հաջորդ պահին մտել եմ։ Բոլորս ենք հասկանում, որ առանց ցուցումի ոչ մի բան չի լինում»։

Հիշեցնենք, որ երեկ ՀՀ դատախազության նախաձեռնությամբ, Երեւան քաղաքի ընդհանուր իրավասության դատարանում, դատավոր Մնացական Մարտիրոսյանի նախագահությամբ, Գրիգորյանի խափանման միջոցի փոփոխման վերաբերյալ արտահերթ դատական նիստ հրավիրվեց եւ Գրիգորյանն ազատ արձակվեց։

Ավելի վաղ հայտնել էինք, որ Մանվել Գրիգորյանը արդեն 2 օր է, որ գտնվում է «Նաիրի» ԲԿ-ի վերակենդանացման բաժնում։ Ըստ պաշտպանների՝ նրա վիճակը ծանր է, նրան միացված է արհեստական շնչառության սարք։

Նշենք, որ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու եւ շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ: