«Ինչո՞ւ ենք թիրախավորել շոու բիզնեսի ներկայացուցիչներին». Դավիթ Անանյանը նշեց պատճառը
Ինչու ենք թիրախավորել շոու բիզնեսի ներկայացուցիչներին, որովհետեւ մենք նրանց օժանդակության կարիքն ենք ունեցել, որպեսզի դրական մշակույթ ստեղծենք: Այս մասին, այսօր՝ հունվարի 13-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը:
Նա նկատեց, որ ամանորյա «Չվերթ 1» շոու ներկայացման մեջ մի դրվագ նվիրված է հարկեր վճարելուն եւ իրենք մտադիր են այդ դրվագը տեղադրել նաեւ ՊԵԿ կայքում. «Այո, մեր շոու բիզնեսի ներկայացուցիչները մեզ շատ են օգնում եւ արդեն մշակույթի մակարդակի են հասցնում հարկեր վճարելը»:
Անանյանը չցանկացավ անուններ հնչեցնել, թե շոու բիզնեսի որ ներկայացուցիչների նկատմամբ կան քրեական գործեր. «Կարեւորը այդ գործերը չեն, այլ այն, որ մարդկանց մոտ առաջացել է հարկեր վճարելու նկատմամբ եթե ոչ մշակույթ, ապա գոնե հետաքրքրություն: մարդիկ, որոնք տարիներ շարունակ չեն էլ մտածել, որ հարկեր վճարելն անհրաժեշտություն է, հիմա մարդիկ կան, որ հետաքրքրվում են իրենց սահմանադրական պարտավորությունների կատարումով»,- ասաց նա:
ՊԵԿ նախագահը տեղեկացրեց, որ շոու բիզնեսի ներկայացուցիչների կողմից հայտարարագրեր ներկայացնողների թիվն ավելացել է՝ հասնելով շուրջ 20-ի: «Այս տարի նորից նրանք մեր ուշադրության կենտրոնում կլինեն, տեսնենք այդ թիվը անգամներով է ավելանում, թե թվաբանական պրոգրեսիայով»:
Ինչ վերաբերում Լարսի անցակետի շուրջ պարբերաբար խնդիրներին, ըստ Անանյանի, Հայաստանի ներկայացուցչի թեկնածությունն արդեն ներկայացվել է կառավարություն: Նրա խոսքով, հիմա տարբեր գերատեսչությունների կարծիքներն են հավաքում, արդեն ունենք ԱԳՆ-ի տեսակետը. «Կարծում եմ, որ այս ամիս՝ հունվարին, նշանակում կունենանք եւ փետրվարից արդեն Լարսի անցակետում կունենանք մեր ներկայացուցիչը»:
Դավիթ Անանյանը հավելեց, որ գործնականում ռուս գործընկերների հետ որեւէ խնդիր չունեն. «Ուղղակի ամեն դեպքի համար համագործակցության տարբեր մակարդակներում մենք կարողանում ենք մեր գործընկերների հետ աշխատել եւ բոլոր խնդիրները կարգավորել: Առանց ներկայացուցչի, դա ավելի շատ ջանք է պահանջում
Գործնականում եղել են մի քանի դեպքեր, որոնց մենք միջամտել ենք եւ ի պատիվ մեր ռուս գործընկերների, արագ լուծումներ են տրվել դրանց՝ լինի կասկած, որ հերքվել է, լինի ժամկետի խնդիր, կամ փչացող ապրանք: Մենք որեւէ խնդիր չունենք Լարսի անցակետում»,-ասաց ՊԵԿ նախագահը: