Boeing-ի նախկին ղեկավարն ընկերությունից ավելի քան 60 մլն դոլար կստանա
Ամերիկյան Boeing ընկերության ղեկավարի պաշտոնից ազատված Դենիս Մյուլենբուրգը վերջնահաշվարկ չի ստացել, սակայն ընկերությունը նրան ավելի քան 60 մլն դոլար կվճարի՝ պայմանագրի կատարման շրջանակներում, հայտնում է BBC-ի ռուսական ծառայությունը։
«Մենք շնորհակալություն ենք հայտնում Դենիսին Boeing ընկերությունում մոտ 35-ամյա աշխատանքի համար։ Ազատվելուց հետո Դենիսը կստանա այն եկամուտը, որը նրան հասնում է պայմանագրով, սակայն նրան չի վճարվի 2019թ․ արդյունքներով վերջնահաշվարկը»,- ասվում է ընկերության հաղորդագրության մեջ։
Այսպիսով, Մյուլենբուրգը անցյալ տարվա արդյունքներով զրկվել է 14,6 մլն դոլարից, սակայն ընդհանուր առմամբ պետք է ստանա 62,2 մլն դոլար։
Boeing-ի նոր ղեկավար Դեւիդ Կելխունն ընկերությունից կստանա 7 մլն դոլար, եթե հասնի նրան, որ վերականգնվեն 737 Max մոդելի ինքնաթիռների չվերթները, որոնք երկու ավիավթարների (346 զոհ) պատճառով անցյալ տարվա մարտից չեն թռչում։
Կելխունը իր պարտականությունների կատարմանը կանցնի հունվարի 13-ից։ Նախկինում նա զբաղեցնում էր ընկերության տնօրենների խորհրդի ղեկավարի պաշտոնը։
Աշխատանքից Մյուլենբուրգի հեռացման մասին հայտնի է դարձել դեկտեմբերի 23-ին։ Նա ընկյերություն է եկել 1985թ․, 2015-ին նշանակվել է Boeing-ի ղեկավար, իսկ մինչ այդ ղեկավարել է տիեզերքի, պաշտպանության եւ անվտանգության վարչությունը։