Ադրբեջանի առաջիկա ընտրությունները իրավիճակը չեն փոխի ղարաբաղյան հակամարտության կարգավորման առումով

Հայաստանում իշխող քաղաքական վերնախավը համոզված է, որ Արցախում պետք է լինեն իշխանություններ, որոնք իրենց քաղաքականությունն ամբողջությամբ կհամաձայնեցնեն: Դեկտեմբերի 23-ին մամուլի ասուլիսի ժամանակ այսպիսի կարծիք հայտնեց Հայաստանի առաջին ՄԻՊ, «Ընդդեմ իրավական կամայականության» հասարակական կազմակերպության գործադիր տնօրեն Լարիսա Ալավերդյանը:

Արցախի առաջիկա ընտրությունների կարեւորությունն ընդգծելով՝ Լարիսա Ալավերդյանը միաժամանակ արձանագրեց այն հայտարարությունների անթույլատրելիությունը, որոնք կասկածի տակ են դնում Արցախի նախորդ իշխանությունների լեգիտիմությունը: «Արցախի իշխանությունները միշտ լեգիտիմ են եղել, եւ վրդովեցուցիչ են սա վարկաբեկելու փորձ կատարող հայտարարությունները: Սա կոպիտ սխալ է, կարեւոր չէ, թե ով է եւ ինչով է առաջնորդվում»,- ասաց Ալավերդյանը:

Ադբեջանում առաջիկա ընտրությունների մասին խոսելիս նա նշեց, որ Ադրբեջանում ընտրությունները ոչ մի կերպ իրավիճակը չեն փոխի Լեռնային Ղարաբաղի առումով: Հակառակը՝ անհրաժեշտ է սպասել ագրեսիվ հռետորաբանության ուժգնացման: Առաջին օմբուդսմենի խոսքով՝ Ադրբեջանում դեմոկրատական փոփոխությունների ցույցերը իրավիճակը վատթարացնում են, միաժամանակ հետապնդում են զգոնությունը բթացնելու նպատակ: Իրենց որպես դեմոկրատներ դիրքավորած հենց այս ուժերն են կազմակերպել հայերի վերջին ջարդերը, շեշտեց Լարիսա Ալավերդյանը: