ՌԴ-ում հայ վարորդների հարցը քաղաքական է. Փաշինյանը Պուտինի հետ հանդիպման ժամանակ պետք է բարձրացնի հարցը
Ավելի քան երեք տարի է՝ Ռուսաստանում հայկական վարորդական իրավունքով ձեռնարկատիրական գործունեություն ծավալելու արգելքի խնդիրն առկա է և ոչ մի կերպ լուծում չի ստանում: Երեք տարի անց, կարծես թե, մեր պաշտոնյաները հասկացել են, որ խնդիրը քաղաքական է, հետևաբար, հենց այդ պատճառով էլ չի լուծվում:
Հիշեցնենք, որ 2017-ին Ռուսաստանը իր օրենսդրության մեջ փոփոխություններ կատարեց, որով արգելվում է օտար երկրի վարորդական իրավունքներով ՌԴ-ում գործունեություն ծավալել: Խոսքը չի վերաբերում անհատներին, այլ նրանց, ովքեր ձեռնարկատիրական գործունեություն են ծավալում: Հետո մնացած երկրների համար բացառություններ արվեցին, ու արդյունքում միայն ՀՀ քաղաքացիները զրկվեցին ՌԴ-ում տաքսի վարելու և այլ տիպի աշխատանք կատարելու, որը կապված է մեքենա վարելու հետ: Սկսած այդ շրջանից, հայ և ռուս պաշտոնյաները գրեթե բոլոր հանդիպումների ժամանակ քննարկել են այդ հարցը, խոստացել շուտափույթ լուծում տալ դրան, սակայն առ այսօր խնդիրը կա:
Երեկ էլ Ազգային ժողովի Տարածաշրջանային և եվրասիական ինտեգրման հարցերի մշտական հանձնաժողովի նախագահ, ԱԺ «Բարգավաճ Հայաստան» խմբակցության պատգամավոր Միքայել Մելքումյանը հայտարարել է, որ Ռուսաստանում բնակվող մեր հայրենակիցների վարորդական իրավունք ստանալու հարցում, ըստ էության, քաղաքական բաղադրիչ կա։ Նա նշել է, որ ՌԴ Պետական դումայում տեղի ունեցած նիստից հետո, հանձնաժողովի նախագահի առաջին տեղակալ պարոն Զատուլինը ասել էր, որ մինչև տարեվերջ այդ հարցը լուծվելու է։ «Մենք հետևում էինք գործընթացներին և ինչ-որ մի պահի՝ նոյեմբերի կեսերին, ես նաև տեղեկատվություն ստացա ԵԱՏՄ կոլեգիայից, որ նախապատրաստական աշխատանքները շատ օպերատիվ են ընթանում, որպեսզի այդ հարցը լուծվի ԵԱՏՄ համապատասխան համաձայնագրով, որովհետև Ռուսաստանի օրենքի այդ կետը հակասում է Ռուսաստանի պարտավորություններին՝ ԵԱՏՄ-ի նկատմամբ»,- ասել է Մելքումյանը՝ առաջարկելով սպասել ԵԱՏՄ անդամ պետությունների կողմից այդ համաձայնագրի վավերացմանը:
Օրերս ՌԴ-ում հայկական վարորդական իրավունքների խնդրին էր անդրադարձել նաև ՀՀ նախկին վարչապետ, Եվրասիական տնտեսական հանձնաժողովի խորհրդի նախագահ Տիգրան Սարգսյանը «Հայկական ժամանակ»-ին տված հարցազրույցում: «Անհրաժեշտ եմ համարում նշել, որ հարցի ի հայտ գալուն պես հանձնաժողովը նախաձեռնել է քննարկումներ՝ ռուսական և հայկական կողմերի մասնակցությամբ, հարցը բազմաթիվ անգամներ քննարկվել է նաև փոխվարչապետների խորհրդի նիստում, և հայկական կողմը բարձրացրել է այդ խնդիրը: Նշեմ, որ, ըստ առկա տեղեկատվության, Ռուսաստանի Դաշնությունը մշակել է համապատասխան օրենսդրական փոփոխությունների փաթեթ, որով նախատեսվում է լուծել այս հարցը։ Այժմ հայկական և ռուսական կողմերը տարբեր հարթակներում, այդ թվում՝ խորհրդարանական, մարդու իրավունքների գրասենյակների հարթակներում շարունակում են քննարկումները հարցի լուծման ուղղությամբ»,- ասել էր Տիգրան Սարգսյանը:
Տևական ժամանակ այս խնդրով զբաղված ԱԺ «Լուսավոր Հայաստան» խմբակցության պատգամավոր Արմեն Եղիազարյանը «Առաջին լրատվական»-ի հետ զրույցում ասել է, որ ինքն էլ է հակված նրան, որ խնդիրը քաղաքական է, հետևաբար և չի լուծվում և շարունակվում է շահարկվել։ «Սա այն խնդիրը չի, այն մասշտաբի խնդիրը չի, որ երեք տարվա մեջ հնարավոր չլիներ լուծում գտնել: Անընդհատ քննարկումներ-քննարկումներ են, բայց տեղում դոփում ենք: Վերջին քննարկման ժամանակ հիմնական արգումենտը, որ ներկայացրեց ռուսական կողմը, դա լեզվի իմացությունն է: Նախ՝ ռուսաց լեզուն չի կարող ընդունվել որպես երկրորդ պետական լեզու և հետո, ենթադրենք, եթե ընդունվի էլ, ապա դա չի նշանակում, որ հաջորդ օրվանից բոլորը սկսելու են ռուսերեն խոսել, տիրապետել լեզվին: Հետևաբար, սա ֆարս է: Ես էլ ասացի, որ եթե խնդիրը ռուսաց լեզուն է, առաջարկեցի, որ քննություններ սահմանեն: Բոլոր այն վարորդները, ովքեր կհանձնեն այդ թեստը լեզվի իմացության, հնարավորություն կստանան աշխատել: Իսկ այն, ինչ իրենք են ասում՝ աբսուրդ է, թե խնդիրը կվերանա, երբ Հայաստանում ռուսաց լեզուն ընդունվի որպես երկրորդ պետական լեզու: Սա կեղծ օրակարգ է ու արհեստածին խոչընդոտ մեր վարորդների համար Ռուսաստանի կողմից»,-ասաց Եղիազարյանը՝ հավելելով, որ այս ամենը իրեն հիմք է տալիս ենթադրելու, որ խնդիրը քաղաքական է և այս օգտագործվում է կրկին քաղաքական նպատակներով, դիրքեր զիջելու իմաստով:
Պատգամավորի խոսքերով՝ ինքը արդեն չի էլ պատկերացնում, թե այս խնդիրը ինչպես կարող է լուծվել, բայց քանի որ ակնհայտ է, որ հարցը քաղաքական է, ապա այն արդեն պետք է բարձրացվի և լուծվի իշխանության՝ վարչապետի մակարդակով։ «Հաշվի առնելով, որ վարչապետը հաճախ է հանդիպում Վլադիմիր Պուտինի հետ վերջին շրջանում, պետք է այդ մակարդակում հարցը բարձրացվի, և հնչեն պատասխաններ, որպեսզի պարզ լինի, թե որտեղ է խնդիրը ու ինչ լուծումներ է ենթադրում: Գուցե այլ տեղում է խնդիրը, և մենք չգիտենք: Բայց կրկնում եմ, ներկա իրավիճակում ես համակարծիք եմ, որ խնդիրը քաղաքական է»,- եզրափակել է նա: