Գերմանիայի կառավարությունը արտաքսում է Ռուսաստանի դեսպանության երկու աշխատակցի

Գերմանիայի կառավարությունն արտաքսում է Ռուսաստանի դեսպանության երկու աշխատակցի Բեռլինում չեչեն նախկին դաշտային հրամանատարի սպանության հետ կապված, տեղեկացնում է DW-ն՝ հղում կատարելով Գերմանիայի ԱԳՆ-ին։

Գերմանիայում Ռուսաստանի դեսպանության երկու աշխատակից պերսոնա նոն գրատա են հայտարարվել, քանի որ Ռուսաստանի իշխանությունները, չնայած կրկնակի եւ համառ պահանջներին, բավականաչափ աջակցություն չեն ցուցաբերել Բեռլինի Tiergarten պարկում 2019 թվականի օգոստոսի 23-ին կատարված սպանության հետաքննությանը։

Վերջին անգամ Գերմանիայի ԱԳՆ ներկայացուցիչ Անդրեաս Միխաելիսը (Andreas Michaelis) դիմել է Գերմանիայում Ռուսաստանի դեսպան Սերգեյ Նեչաեւին նման խնդրանքով նոյեմբերի 20-ին, նշվում է փաստաթղթում։ «Բայց ռուսական կողմը ձգձգել է Գերմանիայի կառավարության պահանջի կատարումը՝ աջակցություն ցուցաբերել հանցագործության հետաքննության հարցում»։

Ինչպես ասվում է ԱԳՆ հաղորդագրությունում, այն համատեքստում, որ Գերմանիայի դաշնային դատախազությունը դեկտեմբերի 4-ից պարտավորվել է հետաքննել այդ հանցագործությունը, ինչպես նաեւ հաշվի առնելով, որ շատ փաստեր վկայում են այն մասին, որ սպանությունը կատարվել է ռուսաստանյան կամ չեչենական իշխանությունների պատվերով, Գերմանիայի կառավարությունը շարունակում է ամենայն լրջությամբ պնդել, որ Ռուսաստանը սկսի աջակցել այս հանցագործության հետաքննությանը։

Der Spiegel ամսագրի տեղեկատվությամբ՝ երկու դիվանագետները, որոնք աշխատում են Բեռլինում Ռուսաստանի դեսպանությունում եւ հայտարարված են պերսոնա նոն գրատա, իրականում ռուսական հատուկ ծառայությունների աշխատակիցներ են։ Այժմ նրանք պետք է հեռանան Գերմանիայից յոթ օրվա ընթացքում։

Ավելի վաղ նույն օրը Գերմանիայի դաշնային դատախազությունը, որը ստանձնել է այս աղմկալի սպանության հետաքննությունը, որը կատարվել է 2019 թվականի օգոստոսին Klenier Tiergarten այգում, տեղեկացրել է, որ ունի հիմքեր կարծելու, որ սպանության կազմակերպմանը կարող են հանցակից լինել Ռուսաստանի իշխանությունները։

Զելիմխան Խանգոշվիլին գնդակահարվել է Բեռլինի Փոքր Թիրգարտեն այգում, օգոստոսի 23-ին։ Նա դաշտային հրամանատար է եղել երկրորդ չեչենական պատերազմի ժամանակ։ Ռուսաստանի իշխանությունները հետախուզում են հայտարարել ահաբեկչության մեղադրանքով։ Խանգոշվիլին մեկնել է Գերմանիա այն բանից հետո, երբ 2015 թվականին նրա դեմ Վրաստանում հերթական մահափորձն է կատարվել։

Խանգոշվիլու ենթադրյալ սպանողին կալանավորել են Բեռլինում նույն օրը, շնորհիվ վկաների ցուցմունքների։ Դա Վադիմ Սոկոլովի անունով ռուսական անձնագիր ունեցող տղամարդ է։