Չինաստանն ԱՄՆ-ին բողոք է հայտնել ույգուրների վերաբերյալ օրինագծի պատճառով

Չինաստանն ԱՄՆ-ին բողոք է հայտնել Կոնգրեսի Ներկայացուցիչների պալատում ույգուրների վերաբերյալ օրինագծի ընդունման պատճառով, որը կապված է Սինցզյան-Ույգուրական ինքնավար շրջանում մարդու իրավունքների պաշտպանության հետ, հայտարարել է Չինաստանի ԱԳՆ պաշտոնական ներկայացուցիչ Հուա Չունյինը, փոխանցում է «ՌԻԱ Նովոստի»-ն:

«ԱՄՆ Ներկայացուցիչների պալատն ընդունել է ույգուրներին վերաբերող, այսպես կոչված, օրինագիծ մարդու իրավունքների ոլորտում քաղաքականության մասին: Այս փաստաթուղթը դիտավորյալ վարկաբեկում է Սինցզյան-Ույգուրական ինքնավար շրջանում մարդու իրավունքների հետ կապված իրավիճակը, ամեն կերպ սեւացնում է Չինաստանի ջանքերը ահաբեկչության եւ արմատականության դեմ պայքարում, չարամիտ հարձակում է Չինաստանի կառավարության վարչական քաղաքականության վրա, լրջորեն խախտում է միջազգային իրավունքը եւ միջազգային հարաբերությունների հիմնական սկզբունքները, չինական կողմը ուժգին վրդովմունք եւ վճռական բողոք է հայտնում»,- նշված է Չինաստանի ԱԳՆ կայքում հրապարակված Հուա Չունյինի հայտարարության մեջ:

Նրա խոսքով՝ «Սինցզյանի հարցն ամենեւին մարդու իրավունքների, ազգության կամ կրոնի հարց չէ, այլ ահաբեկչության եւ անջատողականության բռնկումների դեմ պայքարի հարց է»: «Բախվելով ծայրահեղ լուրջ իրավիճակի՝ Սինցզյան-Ույգուրական ինքնավար շրջանի տեղական իշխանությունները, օրենքների համաձայն, միջոցառումներ են ձեռնարկել ահաբեկչական ակտիվության դեմ պայքարելու համար, դրա հետ մեկտեղ հատուկ ուշադրություն են դարձրել նախնական պատճառների վերացման միջոցառումներին, ներառյալ ապաարմատականացման աշխատանքներն ակտիվորեն առաջ մղելը, տնտեսական զարգացմանն անընդհատ նպաստելը, ազգային համերաշխության ամրապնդումը եւ հասարակության շրջանում ներդաշնակության հաստատումը»,- նշել է նա:

Հուա Չունյինը շեշտել է, որ այս միջոցառումներն աջակցել են Սինցզյանի տարբեր էթնիկ խմբերի 25 մլն ներկայացուցիչներ, ձեռք են բերվել դրական արդյունքներ. Սինցզյանում վերջին 3 տարում ոչ մի ահաբեկչական հարձակում չի կատարվել: «2018 թվականի վերջից 70 երկրներից ավելի քան հազար դիվանագետներ, լրագրողներ, կրոնական կազմակերպությունների ներկայացուցիչներ, միջազգային կազմակերպությունների ներկայացուցիչներ, փորձագետներ եւ գիտնականներ եղել են Սինցզյանում, նրանք մեծ մասամբ հավանության են արժանացրել ապաարմատականացման եւ ահաբեկչության դեմ պայքարի աշխատանքը»,- հայտարարել է չինացի դիվանագետը:

Ինչպես ավելի վաղ ընդունված՝ «Հոնկոնգում մարդու իրավունքների եւ ժողովրդավարության պաշտպանության մասին» օրենքը, որն արդեն ուժի մեջ է մտել, այս օրինագիծը կարող է սրել ԱՄՆ-ի ու Չինաստանի տարաձայնությունները եւ ազդել այս երկրների միջեւ վարվող առեւտրային բանակցությունների վրա:

Ավելի վաղ ԱՄՆ Կոնգրեսի Ներկայացուցիչների պալատն օրինագիծ էր ընդունել Չինաստանում ույգուրներին աջակցելու մասին, որոնց իրավունքները, ամերիկյան իշխանությունների կարծիքով, խախտվում են: Օրենք դառնալու համար օրինագիծը պետք է ընդունի Սենատը եւ ստորագրի երկրի նախագահ Դոնալդ Թրամփը, ինչի հեռանկարները հստակ չեն: Փաստաթղթով պատժամիջոցներ են նախատեսվում այն չինացի պաշտոնյաների դեմ, որոնք, ԱՄՆ իշխանությունների կարծիքով, Սինցզյան-Ույգուրական ինքնավար շրջանում խախտում են մարդու իրավունքները: