Բրազիլիայի նախագահը մեղադրել է Լեոնարդո Դի Կապրիոյին Ամազոնիայի անտառային հրդեհները հովանավորելու մեջ

Բրազիլիայի նախագահ Ժաիր Բոլսոնարուն ուրբաթ ասել է, որ դերասան Լեոնարդո Դի Կապրիոն հովանավորում է հասարակական կազմակերպություններին, որոնց անդամները կասկածվում են Ամազոնիայի անտառների հրդեհումների մեջ։ Այսպիսի կարծիք քաղաքական գործիչը հայտնել է կողմնակիցների հետ շփվելիս, որոնք հավաքվել էին ողջունելու նրան պաշտոնական նստավայրի մոտ։ Հանդիպումը ցուցադրվել է Բոլսոնարուի ֆեյսբուքյան էջում, տեղեկացնում է ՏԱՍՍ-ը։

«Լեոնարդո Դի Կապրիոն հիանալի տղա է, ճի՞շտ է։ Փող է տալիս, որպեսզի հրդեհեն Ամազոնիան»,- ասել է քաղաքական գործիչը ի պատասխան կողմնակիցներից մեկի՝ երկրի բնական ռեսուրսները պահպանելու խնդրանքի։ Բոլսոնարուն չի պարզաբանել, թե ինչ նկատի ունի, բայց խոսքը կարող է վերաբերել երկուշաբթի կալանավորված մի շարք հասարակական կազմակերպություների անդամներին, որոնց Պարայի հյուսիսային նահանգի ոստիկանությունը մեղադրում է արգելոցային անտառի հրդեհման մեջ զբոսաշրջիկների ամենասիրած վայրերից մեկում՝ Ալտեր դու Շաուում։

Քննության վարկածով՝ միտումնավոր հրդեհումներին հանցակից են այստեղ գործող երեք ՀԿ-ներ։ Իրավապահ մարմինները մատնանշում են, որ այդ կազմակերպությունները Ամազոնիայում հրդեհներն սկսվելուց անմիջապես հետո պայմանագրեր են ստացել Վայրի բնության համաշխարհային հիմնադրամի (WWF) հետ եւ կարող են վաճառել «կանաչներին» որոշ լուսանկարներ, որոնք նրանք իրենց հերթին օգտագործել են բնական աղետների դեմ պայքարի նպատակով միջոցներ հավաքելու համար։ Ֆիլանտրոպներից մեկը դարձավ Լեոնարդո Դի Կապրիոն։ Բոլսոնարուն իր վարկածը ներկայացրել է նաեւ Ֆեյսբուքի ամենշաբաթյա ելույթում՝ դերասանին ասելով, որ այդկերպ նա «ֆինանսավորում է հրդեհներն Ամազոնիայում»։

Հինգշաբթի գործով կասկածյալները ազատ են արձակվել, իսկ տեղի իշխանությունները օպերատիվ գործողություններում ընդգրկել են սեփական անվտանգության ծառայությանը եւ փոխել են քննչական բրիգադի ղեկավարին, տեղեկացրել է O Globo թերթը։ Ինչպես նշել է նահանգի դատախազությունը, տեղի իրավապահ մարմինների վարկածը տարբերվում է դաշնային հետաքննության տվյալներից։

Ալտեր դու Շաուն հանրահայտ հանգստավայր է Ամազոնի եւ նրա վտակ Տապաժոսի միախառնման տեղում։ Այստեղ է, The Guardian-ի կարծիքով, գտնվում աշխարհի քաղցրահամ ջրերի ամենագեղեցիկ լողափը։ 7 հազար բնակիչ ունեցող բնակավայրն ամեն տարի ընդունում է մոտ 60 հազար զբոսաշրջիկ։

Բրազիլական Տիեզերական հետազոտությունների ազգային ինստիտուտի տվյալներով, հունվար-նոյեմբերին հրդեհները ոչնչացրել են ավելի քան 6,5 մլն հեկտար անտառ Ամազոնիայում, որոնք գտնվում են Բրազիլիայի տարածքում։ Կրակի տարածման ֆոնին բրազիլական հասարակությունում սկսել են քննադատել Բոլսոնարուին եւ նրա կառավարությանը, թե նրանք, ընդդիմախոսների խոսքով, բավականաչափ ուշադրություն չեն հատկացնում շրջակա միջավայրի պահպանությանը։ Իրենց հերթին, իշխանությունները պնդում են, որ հրդեհների մի մասը պայմանավորված է բնական սեզոնային պատճառներով, այն դեպքում, երբ մյուս մասը հետեւանք է միտումնավոր հրդեհումների։