Հայաստանում օգտատերերի «կիբեռհիգիենայի» հետ կապված խնդիրներ կան․ փորձագետ

Կիբեռանվտանգության հետ կապված միջազգային վարկանիշներում Հայաստանի ցածր դիրքերը կապված են փաստաթղթավորման բացակայության հետ։ Այս մասին այսօր ArmSec համաժողովում քննարկումների ժամանակ ասաց Нelix Consulting ընկերության ղեկավար Արամ Մխիթարյանը՝ խոսելով այն հանգամանքի մասին, որ Հայաստանը մշտապես միջազգային վարկանիշների «պոչին» է գտնվում։

Նրա խոսքերով, անհրաժեշտ է կողմնորոշվել, թե ինչն է ավելի կարեւոր՝ կիբեռանվտանգության միջազգային վարկանիշներում լավ տեղերը, թե կիբեռանվտանգության ապահովման իրական հիմքերը։ «Անկախ վարկանիշներից , մենք երկիր ենք, որը մշտական կիբեռպատերազմի մեջ է հարեւան Ադրբեջանի հետ։ Այսպես թե այնպես մենք ստիպված ենք անընդհատ պաշտպանվել , հնարավոր է, նաեւ այդ պատճառով փաստաթղթավորման համար ժամանակ չի մնում»,- հայտարարեց Մխիթարյանը։ Նա ընդգծեց, որ վարկանիշներում լավ դիրքերը կիբեռանվտանգության իրական բարձր մակարդակ չեն երաշխավորում։ Սրա հետ կապված՝ նա նշեց Վրաստանի իրավիճակը՝ ասելով, որ թեեւ այդ երկիրը վարկանիշներում առաջատար դիրքեր է զբաղեցնում, միեւնույն է, չկարողացավ դիմակայել վերջին կիբեռգրոհին, երբ մեկ օրվա մեջ մոտ 2000 նման դեպք էր գրանցվել։

Մխիթարյանն առաջարկեց կիբեռանվտանգության հարցը պատշաճ մակարդակի կրթության ապահովման տեսակետից դիտարկել։ «Մենք ունենք օգտատերերի, այսպես ասած, կիբեռհիգիենայի հետ կապված խնդիր։ Մարդիկ չգիտեն ինչպես ճիշտ օգտագործել տեխնոլոգիաները։ Վերջին կիբեռգրոհները եղել են մարդկային սխալի պատճառով»,- հայտարարեց նա։