Ապրիլյան պատերազմը քննող հանձնաժողովը չի կարող բացահայտել բանակի բոլոր խնդիրները
Կան հարցեր, որոնց 2016 թվականի ապրիլյան քառօրյա պատերազմի հանգամանքները քննող հանձնաժողովը չի կարող պատասխանել, իսկ պաշտպանության նախարարությունը չի փորձում պատասխանել այդ հարցերին: Այս մասին նոյեմբերի 21-ին լրագրողների հետ զրույցում հայտարարեց Հետախուզադիվերսիոն ջոկատի հիմնադիր, հրամանատար Վովա Վարդանովը:
Նրա խոսքով՝ հայկական բանակի խնդիրն այն է, որ այն ունի հնացած կառուցվածք, այն դեպքում, երբ պետք է փոփոխություններ անցկացվեին, իսկ 1,5 տարի առաջ տեղի ունեցած հեղափոխությունը պետք է ազդեր պաշտպանական համակարգի վրա: «Նախկին իշխանությունները փորձում էին լուրջ փոփոխություններ կատարել, այդ թվում սահմանելով «Ազգ-բանակ» թեզը, ինչը բավարար չէր, սակայն անհրաժեշտ քայլ էր բանակի հանդեպ վերաբերմունքի փոփոխության համար: Ապա սկսվեց ակտիվ պահեստուժի ստեղծման պրոցես, որը 2 ամիս առաջ զորավարժություններ անցկացրեց»,- նշեց նա:
Փորձագետը հավելեց, որ մոբիլիզացիայի սովետական համակարգը,երբ բանակը համալրվում էր ռազմական առումով անգրագետ պահեստազորայիններով, կարող է իրեն թույլ տալ բազմամիլիոնանոց Չինաստանը, այլ ոչ թե Հայաստանը: «Մարդկանց, որոնք պատրաստ են պաշտպանել հայրենիքը, պետք է սովորեցնել եւ նրանցով համալրել պահեստազորը: Դա պետք է արվեր «Ազգ-բանակ» հայեցակարգի սահմանումից հետո, սակայն շարունակություն մինչ այժմ չենք տեսնում: Լավ է, որ այդ հայեցակարգից չենք հրաժարվում, այնպես, ինչպես դրական ամեն ինչից, ինչպես վստահեցնում է Տոնոյանը (ՀՀ պաշտպանության նախարարը-խմբ.)»,- նշեց Վարդանովը:
Նա արձանագրեց, որ խորհրդարանական Քննիչ հանձնաժողովի անդամները ռազմական գործին չեն տիրապետում, իսկ հրավիրված փորձագետները նույն հին համակարգի հետեւորդներն են: «Ես լուրջ ակնկալիքներ չունեմ, որ Հանձնաժողովը կպարզի այն փաստը, որ խորհրդային համակարգն իրեն սպառել է, եւ պետք է ուրիշը ստեղծել, այն զուգահեռ օգտագործել, իսկ այնուհետեւ ամբողջությամբ փոխարինել: Բացառված չէ, որ որոշ սխալներ կհայտնաբերվեն, բայց դրանք կշտկվեն նույն հին համակարգի շրջանակում»,- պարզաբանեց ռազմական փորձագետը:
Նրա գնահատմամբ՝ ապրիլյան էսկալացիայի քննությունը չի քաղաքականացվում, ինչն արդեն մեծ պլյուս է, եւ տպավորություն է ստեղծվում, որ փորձում են ամեն ինչ օբյեկտիվորեն ուսումնասիրել: «Այո, կան հայտարարություններ, որոնք արվում են ի պատասխան սադրիչ հարցերի, բայց Հանձնաժողովի աշխատանքում ոչ մի քաղաքական ենթատեքստ չի երեւում»,- եզրափակեց Վովա Վարդանովը:
Հիշեցնենք, որ 2019 թվականի մայիսին ստեղծվել է Լեռնային Ղարաբաղում 2016 թվականի ապրիլյան իրադարձությունների խորհրդարանական քննիչ հանձնաժողով: