Շաքարավազի շուկայում տնտեսավարող սուբյեկտների չափաբաժնի 20 տոկոս փոփոխություն կա․ ՏՄՊՊՀ նախագահ
Մի շարք ոլորտներում տնտեսվարող սուբյեկտների չափաբաժինների փոփոխություն կա։ Այս մասին այսօր` նոյեմբերի 4-ին, Ազգային Ժողովում լրագրողների հետ զրույցում ասաց Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը։
Նրա խոսքով` էական փոփոխություն կա շաքարավազի և կարագի շուկայում. «Շաքարավազի շուկայում խոսքը 20 տոկոսի փոփոխության մասին է, նախկինում իրացման 91 տոկոսը բաժին է ընկել մի ընկերության։ Հիմա ուսումնասիրում ենք բենզինի ոլորտը, որտեղ, կարծում եմ, տարվա վերջում դրական դինամիկա կլինի, ինչպես նաև գազի և կոնյակի ոլորտները։ Իհարկե, կոնյակի ոլորտում մենաշնորհի մասին խոսելը մի քիչ ճիշտ չի լինի, քանի որ այնտեղ խաղացողների թվաքանակը բավականին շատ է, այնտեղ արդեն այլ հարաբերություններ ենք ուսումնասիրում»,- ասաց Գևորգյանը։
ՏՄՊՊՀ նախագահն ասաց, որ գերիշխող դիրք գրավող գազավորված ըմպելիքների շուկայում երկու վարույթ են ունեցել և հիմա մշակում են այդ ոլորտի «խաղի կանոնները», թե ինչպես հետագայում նրանք պետք է բիզնես գործունեություն իրականացնեն։
«Նմանատիպ ծրագիր մեկնարկում ենք նաև «Գրանդ տոբակո» ընկերության հետ, որպեսզի հետագայում խուսափենք խախտումներից»,-ասաց նա։
Գեղամ Գևորգյանը նշեց, որ դեղերի շուկայում են գործունեություն ծավալում եւ ցանկանում են, որ դեղ ներմուծողների եւ դեղատների գործունեությունը վերահսկվի. «Նաեւ ՌԴ մեր գործընկերների հետ կատարում ենք համաշխարհային դեղերի շուկայի ուսումնասիրություն, որի հետեւանքով կարծում եմ` դեղերի գները կիջնեն»:
ՏՄՊՊՀ նախագահը նշեց, որ բանանի շուկայում դեռ ուսումնասիրություն չեն կատարել։