«Ձգտում եմ, որ մեր համակարգն մի քանի քայլ առաջ լինի»․ ինչո՞ւմ էր թերացել Օսիպյանը․ Արման Սարգսյանը պատասխանել է լրագրողների հարցերին

Ոստիկանության համակարգը դեռ փոխվելու է։ Այս մասին այսօր` հոկտեմբերի 28-ին, ԱԺ-ում լրագրողների հետ զրույցում ասաց ՀՀ Ոստիկանապետի պաշտոնակատար Արման Սարգսյանը՝ պատասխանելով հարցին, թե Օսիպյանի հեռանալուց հետո ինչ փոփոխություններ են կատարվել համակարգում։

«Մոտեցումները շատ հարցերում կարող են փոխվել»,-նշեց նա։

Արման Սարգսյանը հրաժարվեց գնահաել՝ համակարգն իր թե Օսիպյանի օրոք էր ավելի լավ վիճակում։ «Առհասարակ բոլոր ղեկավարները ձգտում են, որ իրենց ղեկավարած կառույցը մեկ քայլ առաջ լինի, ես ձգտում եմ՝ մի քանի քայլ առաջ լինի: Պետք է ձևավորենք գրագետ ոստիկանություն, լավ կլինի՝ հասարակությունը առջևից գնա, մենք հասնենք իրենց։ Ոստիկանության ստորաբաժանումներին հստակ հանձնարարություն է տրվել, որ իրենք ավելի լուրջ ձևով մոտենան ֆիզիկական պատրաստականության և, առհասարակ, ծառայության կազմակերպման աշխատանքներին»,-նշեց նա։

Իսկ, մասնավորապես, այն դեպքով, որի ժամանակ ոստիկան էր սպանվել, նա ասաց, որ ենթադրում է՝ ոստիկանության ծառայողների կողմից հանցագործությունը կատարած անձանց հնարավորությունների թերագնահատման արդյունքում է եղել, ապա շեշտեց․ «Մենք անելիք տեսնում եմ, մեր ոստիկանները պետք է լինեն ավելի լավ պատրաստված»։

Դիտարկմանը, որ ոստիկանները շատ դեպքերում ասում են՝ շառից փորձանքից ի պաշտոնակատարն արձագանքեց․ «Ձեր ասածի մեջ ճշմարտություն կա, բնականաբար, բոլորը, այդ թվում՝ ոստիկանները չեն ցանկանում ընկնել քաշքշուկների մեջ, բայց եթե ոստիկանները ունենան բավարար գիտելիքներ իրենց կողմից օրենքով նախատեսված լիազորություններն իրականացնելու ընթացքում․․․սակայն որոշակի անելիքներ կան ոստիկանության ծառայողների կրթական եւ պրակտիկ իրավիճակներում ճիշտ կողմնորոշվելու հարցում»։

Նա նշեց, որ համակարգում ոչ պակաս, քան 26 տոկոս ավելացել է ծառայողների պարգևավճարը, իսկ իր պարգևավճարի մասով Սարգսյանը հստակ չպատասխանեց, ասաց, որ վերջնական չի կարող աասել։

Պետք է նշել սակայն, որ Ոստիկանապետի պաշտոնակատարը Հովհաննես Քոչարյանի ազատման մասին հարցերին խուսափողական պատասխաններ էր տալիս:

«Քաղաքական հայտարարության համար աշխատանքից ազատված Հովհաննես Քոչարյանը պրոֆեսիոնալ կադր էր, լավ իրավաբան էր, բայց մասնավոր դեպքով մի նայեք»,- ասաց Արման Սարգսյանը։

Դիտարկմանը, որ վարչապետը բազմիցս ասել է, որ ոստիկանությունը չպետք է քաղաքականացվի և Հովհաննես Քոչարյանն էլ է այդ համատեքստում հայտարարություն արել, ոստիկանապետի պաշտոնակատարը խուսափողական պատասխան տվեց․ «Եթե ոստիկանությունը վարչապետին ենթակա մարմին է, գնահատականները նայեք ընդհանուր տեղի ունեցած իրադարձությունների ենթատեքստում, դրա մասին հստակ գնահատական կա տրված վարչապետի մամուլի խոսնակի մակարդակով»։

Արման Սարգսյանը պնդեց՝ որպես ոստիկանապետի պաշտոնակատար իր դիրքորոշումը համընկնում է վարչապետի դիրքորոշման հետ, իսկ որպես մասնավոր անձ ունի իր սեփական դիրքորոշումը․ «Ես ունեմ այն դիրքորոշումը, որ դիրքորոշումը ունի այն ղեկավարը, որ ինձ նշանակել է։ Ես իմ սեփական դիքրորոշումը ունեմ, բայց եկեք չմոռանանք՝ ես և առհասարակ ոստիկանությունը վարչապետին ենթակա մարմին է»։

Հարցին՝ չի՞ ափսոսում Քոչարյանի կորստի համար, նա պատասխանեց․ «Ես բոլոր մարդկանց և լավ կադրերի կորուստը ափսոսում եմ»։

Արման Սարգսյանը պնդում է՝ գիտի 25 տարեկան մարդկանց, որոնց պարագայում հնարավոր է ղեկավարել ոստիկանությունը․ «Բնականաբար կարող է ղեկավարել 25 տարեկանը, նայած թե ով է այդ 25 տարեկանը, եթե նման խնդիր ծագի, որ նշանակեն 25 տարեկանի, ինքը պետք է ունենա անհրաժեշտ մասնագիտական և մարդկային որակները։ Եթե տարիքային ցենզը հաշվի է առնվել պատգամավորների պարագայում․․․ ոստիկանությունում կան աշխատակիցներ, որոնք 35 տարեկան են, բայց զբաղեցնում են կրտսեր խմբի պաշտոններ, այդ տարիքը սահմանվել է ՀՀ նախագահի համար․․․Ես առաջնորդվում եմ օրենքով, իսկ այդ հարցում եթե եղել են քննարկումներ, հնարավոր է և դեմ կարծիքներ են եղել, ես որպես մասնավոր անձ ունեմ իմ կարծիքը, բայց ձեր հարցերին որպես ոստիկանապետ եմ պատասխանում, մարդը պետք է լինի պրոֆեսիոնալ»։

Նա պնդում է՝ եթե լինի անձ, որը կունենա այն որակները, որոնք անհրաժշետ կլինեն այդ թիմային աշխատանքը կատարելու համար․ «Հնարավոր է՝ ոստիկանությունում ծառայող որևէ մեկը անհամեմատ ավելի վատ կառավարի, քան մի անձ, որը ոստիկանության գործունեությանը ծանոթ է իրավական ակտերի մակարդակում, եթե այդպես որոշվի, դրանում որևէ ողբերգություն չեմ տեսնում»։

Դիտարկմանը, որ 25 տարեկանը չի ունենա տարիների փորձ, արդյոք պրոֆեսիոնալիզմի համատեքստում կարևոր չէ փորձը, Սարգսյանն արձագանքեց․ «Պրոֆեսիոնալիզմը կոմպլեքս է, ներառում է մարդկանց հետ հարաբերվելու հմտությունը, գիտելիքը»։

Հիշեցնենք, որ ԱԺ-ում քննարկվում էր Ազգային անվտանգության մարմիններում ծառայության մասին» և «Ոստիկանությունում ծառայության մասին» օրենքներում փոփոխություններ կատարելու՝ «Լուսավոր Հայաստանի» առաջարկը, որի համաձայն ԱԱԾ տնօրեն և ոստիկանապետ կարող են նշանակվել բոլոր այն անձինք, որոնք բավարարում են պատգամավորի թեկնածուին ներկայացված պահանջներին: Նախկին փոխոստիկանապետ Հովհաննես Քոչարյանը դեմ էր արտահայտվել ոստիկանապետի պաշտոնը քաղաքականացնելուն և իր հայտարարության համար ազատվել զբաղեցրած պաշտոնից։

Լրագրողները հարցրին նաև, թե Ոստիկանապետի Ժամանակավոր պաշտոնակատար բառակապակցությունը արդյոք կհանվի և Արման Սարգսյանը կմնա այդ պաշտոնում, ինչին նա պատասխանեց. «Վարչապետն ասել է, որ իմ հետագա պաշտոնավարման հարցին կանդրադառնանք երկուստեք արդյունքներն արձանագրելուց հետո: ժամկետների մասին տեղյակ չեմ»:

Հարցին, թե ցանկություն կա պաշտոնավարումը շարունակել արդեն որպես ոստիկանապետ, նա նշեց. «Ես կանեմ հնարավորը, որպեսզի իմ ծառայողական պարտականությունները կատարեմ բարեխղճորեն եւ ավելի լավ: Բնականաբար, եթե համաձայնվել եւ զբաղեցնում եմ պաշտոնը, անկասկած, կցանկանամ մնալ, շարունակել պաշտոնավարել, բայց դա որոշողը ես չեմ, ես միայն բարձր պատասխանատվությամբ իմ պարտականությունները կատարողն եմ, ինչը որ անելու եմ»: