Հայաստանում տղա երեխային նախապատվություն տալու վերաբերյալ քննարկում է անցկացվել
Եկեղեցիների համաշխարհային խորհրդի հայկական միջեկեղեցական բարեգործական հիմնադրամը ՄԱԿ-ի բնակչության հիմնադրամի հայկական գրասենյակի հետ համատեղ հոկտեմբերի 17-ին Էջմիածնում քննարկում է անցկացրել «Տղա երեխային նախապատվություն տալու եւ աղջիկների թերագնահատումը կանխելու գլոբալ ծրագրի» շրջանակում:
Քննարկմանը մասնակցել են Հայ առաքելական եկեղեցու, ՄԱԿ-ի բնակչության հիմնադրամի հայկական գրասենյակի ներկայացուցիչներ, փորձագետներ:
Քննարկման շրջանակում ՄԱԿ-ի բնակչության հիմնադրամի հայկական գրասենյակի գենդերային ծրագրերի վերլուծաբան Լուսինե Սարգսյանը նշել է իրավական, քաղաքական, աշխատանքի ոլորտներում կանանց նկատմամբ խտրականության բացառման ուղղությամբ աշխատանքի կարեւորությունը: «Կարեւոր է, որ հասարակության մեջ կանայք դիտարկվեն որպես անհատ, այլ ոչ թե որպես ընտանիքի անդամ, որը պետք է զբաղվի միայն տնային տնտեսությամբ»,- նշել է նա:
ՄԱԿ-ի բնակչության հիմնադրամի հայկական գրասենյակի ծրագրերի համակարգող Նարինե Բեգլարյանը նշել է, որ քահանաների հետ աշխատանքը կարեւոր է սեռով պայմանավորված աբորտների կանխման տեսանկյունից:
«Քահանաների հետ աշխատանքը շատ կարեւոր է, քանի որ նրանք ուղիղ շփման մեջ են բնակչության հետ: Բացի օրենսդրական փոփոխություններից, կարեւոր է նաեւ մտածելակերպի փոփոխությունը: Փորձը ցույց է տվել, որ աբորտների լրիվ արգելքը կարող է խնդիրներ առաջացնել, քանի որ ավելի նպատակահարմար է աշխատել դրանց կանխման եւ հետագայում սեռով պայմանավորված աբորտների բացառման ուղղությամբ»,- հավելել է նա:
Եկեղեցիների համաշխարհային խորհրդի Կլոր սեղանի հիմնադրամի գործադիր տնօրեն Կարեն Նազարյանը նշել է, որ աբորտների դեմ պայքարի խնդիրը Հայ առաքելական եկեղեցու եւ մեզ համար այն խնդիրներից մեկն է, որի դեպքում կարծիքները համընկնում են: «Տղամարդիկ եւ կանայք միանման չեն, այդ թվում կենսաբանական տեսակետից: Տղամարդու տեսակը տարբերվում է իր բազմակերպությամբ, մինչդեռ կանայք ավելի կայուն են: Անհրաժեշտ է կենտրոնանալ ոչ թե այն փաստի վրա, թե որ սեռն է ավելի լավը կամ վատ, այլ աբորտների դեմ պայքարելու վրա՝ անկախ այն բանից, թե ինչ պատճառով են կատարվում»,- նշել է Նազարյանը:
Եզնիկ արքեպիսկոպոս Պետրոսյանի խոսքով՝ տղամարդու եւ կնոջ միջեւ հավասարություն չկա, իսկ երբ խոսվում է կանանց իրավունքներով օժտելու մասին, անհրաժեշտ է հասկանալ, որ դա կհանգեցնի պարտավորությունների ի հայտ գալուն: «Չի կարելի միանշանակ ասել, որ եթե մենք կնոջն օժտում ենք ինչ-որ իրավունքով, ապա նա ավելի երջանիկ է դառնում»,- հավելել է նա:
Հայ առաքելական եկեղեցու ներկայացուցիչը համոզմունք է հայտնել, որ չկա կատարյալ փաստաթուղթ, եւ եթե, օրինակ, Ստամբուլյան կոնվենցիան մեր երկրի համար ընդունելի լինի՝ հաշվի առնելով որոշակի թերությունները, ապա «ես այն կընդունեմ՝ հասկանալով, որ դա նույնպես կատարյալ չէ»:
Լուրեր Հայաստանից - NEWS.am
!