Թույլ չենք տալու, որ համայնքապետարանի դուռը բացվի. Նորաշենցիները՝ Կառավարության շենքի մոտ բարձրախոսներով (Տեսանյութ)

Ինչպես ավելի վաղ նշել էինք, Նորաշենի բնակիչներն այսօր բողոքի ակցիա են իրականացնում Կառավարության դիմաց՝ պահանջելով իրենց նախկին համայնքապետ Նորայր Գրիգորյանին վերադարձնել իր պաշտոնին։

Արարատի մարզի Նորաշեն համայնքի բնակիչների խաղողագործությունը կանգնած է, համայնքապետարանի աշխատակիցները չեն կարողանում տեղեկանքներ տրամադրել գյուղացիներին, իսկ գյուղում մեկը մյուսի թշնամին է դարձել։ Այս մասին այսօր՝ հոկտեմբերի 3-ին, լրագրողների հետ զրույցում ասաց համայնքապետարանի առաջատար մասնագետ Մարինե Խաչատրյանը։ 

Մարինե Խաչատրյանն ասաց, որ Արարատի մարզպետ Գարիկ Սարգսյանն իրենց խոստացել էր՝ վերանայել իր որոշումը։ Խաչատրյանի խոսքով՝ մարզպետը կողմնակից էր ներկայիս համայնքապետի պաշտոնակատար Արտակ Հարությունյանին, ում պաշտոնավարմանը համայնքի բնակիչները դեմ են։

«Պարոն Նիկոլ Փաշինյան, եթե տեղյակ չեք, իմացեք սրա մասին, նստել է մարզպետ, փոխանակ խնդիրներ լուծի, համայնքի բնակիչները, որ ասել են կոկորդիլոս եւ այլն եւ այլն, ասել է՝ չէ պետք է գան ինձնից ներողություն խնդրեն, հետո թե՝ թող ներողություն խնդրեն մամուլից։ Դու մարզպե՞տ ես, թե շփոթել ես փողոցի բազառի հետ»,- ասաց նորաշենցիներից մեկը։

«Ուժ եւ իրավունք» հկ հիմնադիր Ռուբեն Հովհաննիսյանն ասաց, որ մարզպետը չունի բավարար հիմքեր Նորայր Գրիգորյանի լիազորությունները դադարեցնելու, քանի որ նա իր պաշտոնավարման ընթացքում համայնքում արել է բարեփոխումներ. «Փողոցներն արդեն ասֆալտապատվում է։ Եթե դուք հանում եք 2 տարվա գյուղապետին, եւ ունեք հիմքեր, ասում եք անգործության է մատնված. Դուք տարի ու կես նստած եք, ոչ մի բան չեք անում։ Սա հո ձեզ համար Մոսկվայի բլոկի ցեխի չի՞, սա Արարատի մարզ է, սա լուրջ կառույց է, կան շատ բնակիչներ։ Էս մարզն էն մարզը չէ, որ ամեն ինչին հելնի գա հասնի ստեղ։ Էտ մարդիկ իրար հարգել գիտեն, գործ տվողներ չեն եւ այդ կառույցին պետք է նորմալ ղեկավար։ Եկել նստել եք բարեկամներին բերել լցրել եք, խորհրդականը ասում է՝ գնացեք ստեղից, ստեղ դուռ մի բացեք, մի փակեք, տեղակալը բաջանաղն է, լավ, ձերոնցով եկեք նստեք, բայց մի մտեք մնացած հարցերի մեջ։ Սա համայնք է, բերել եք բարեկամներին խառնել եք իրար, մեկը մեկին բարեւ չի տալիս, հանում եք իրար դեմ։ Երեկ խոսք տվեցիք որ այդ հարցը կլուծվի, ամեն անգամ մի բան խոսք եք տալիս, ճանապարհում եք»։

Նորաշենի բնակչուհի Ալինա Կարապետյանն ասաց, որ ներկայումս համայքնը բաժանվել է 2 մասի, մի մասը սատարում է նախկին գյուղապետին, մյուս մասը՝ ներկայիս համայնքապետին. «Արյունահեղութուն կլինի, նա ինձ ասում է՝ ահաբեկում եք։ Ես չեմ ահաբեկում, ես բացատրում եմ, որ կարող են լինել դեպքեր, որ 2 կողմերը բախվեն իրար, ոչ թող լինի Արտակ Հարությունյանը, ոչ էլ՝ Նորայր Գրիգորյանը, թող լինի ներկայիս ժամանակավոր պաշտոնակատարը Աշոտ Ստեփանյանը։ 3 օր է, որ մարզպետարանում ենք, պարոն Սարգսյանը մեզ անամոթաբար խաբում է, եւ ասում է՝ եկեք ներողություն խնդրեք ինձնից ամբողջ գյուղով, ինչի՞ համար, որ վանկարկել ենք, անհանգստացրել ենք, դուռն ենք ծեծել։ Մեզ ներսում պարզ ասում է՝ թքած ունեմ համայնքի ձայների վրա, որոշել եմ, խոստացել եմ ու պիտի անեմ»։

Նորաշենի համայնքապետարանի աշխատակազմի քարտուղար Քնարիկ Ղազարյանն ասաց, որ համայնքապետարանը 6 ամսվա ընթացքում 3 անգամ ավագանու նիստ է հրավիրել, սակայն ավագանու անդամները չեն ներկայացել նիստերին, պատճառաբանելով, թե իրենց քարտուղարը չի տեղեկացրել նիստի մասին.

«Մենք 2 ամիսը մեկ, օրենքով սահմանված կարգով, պարտավոր ենք հրավիրել ավագանու նիստ։ Մենք 6 ամսվա ընթացքում կայացրել ենք 3 ավագանու նիստ, նիստը 7 օր առաջ ներկայացնում ենք մարզպետարան, որ նշված օրը, նշված ժամին կայանալու է համայնքապետարանում ավագանու նիստ։ Ես 7 ավագանու անդամներին հեռախոսազանգով տեղեկացրել եմ։ Մենք պահանջում ենք մեր նախորդ գյուղապետին, իր հետ աշխատել ենք 2 տարի 6 ամիս, շատ գոհ ենք իր աշխատանքից։ Եթե մեր պահանջը չկատարվի, չենք աշխատելու։ Թույլ չենք տալու, որ համայնքապետարանի դուռը բացվի»։

Ավելի վաղ հայտնել էր, որ Նորաշենի ավագանու արձանագրության համաձայն դադարեցվել են գյուղապետ Նորայր Գրիգորյանի լիազորությունները: Վերջինիս կողմնակիցները դուրս են եկել բողոքի եւ հայտարարում են, որ այդ որոշումն անօրինական է, որ չկա ավագանու նիստի արձանագրություն, որն իրավազոր կլինի: Ակցիայի մասնակիցները գյուղապետի գլխավորությամբ պահանջում են իրենց ներկայացնել այդ արձանագրությունը, որի հիման վրա Տարածքային կառավարման եւ ենթակառուցվածքների նախարությունը դադարեցրել է գյուղապետի լիազորությունները:

Նորայր Գրիգորյանը հայտարարել է, որ մարզպետի հետ իր հարաբերությունները լարվել են, երբ ինքը ընտրությունների ժամանակ պաշտպանել է այլ թեկնածուի՝ Սերգեյ Ատոմյանին, ով նույնպես պատգամավոր է ընտրվել «Իմ քայլը» խմբակցությունից: