Քրոմոսոմային եզակի անոմալիայի պատճառով 3-ամյա աղջիկը չի կարողանում ուտել եւ խոսել
Շոտլանդիայից 3-ամյա Նյարան աշխարհում միակ պացիենտն է, որն ունի քրոմոսոմային մուտացիաների յուրահատուկ լրակազմ:
Daily Record-ը հայտնում է, որ Նյարայի 13-րդ քրոմոսոմի մեջ հայտնաբերվել են դելեցիաներ եւ դուպլիկացիաներ, ինչի հետեւանքով քրոմոսոմի հատվածը կրկնապատկվել է, առկա է նաեւ քրոմոսոմային վերակառուցում: Ծնողները նորածին աղջկա տկարության վրա ուշադրություն են դարձրել, սակայն բժիշկները դրա պատճառը կարողացել են հայտնաբերել միայն այն ժամանակ, երբ Նյարան դարձել է 16 ամսական:
Քրոմոսոմային հիվանդության պատճառով, որն անգամ անվանում չունի, աղջիկը չի կարողանում քայլել, խոսել եւ ուտել: Դրանից բացի, փոքրիկը ծնվել է առանց կոշտուկավոր մարմնի, որը միացնում է գլխուղեղի աջ եւ ձախ կիսագնդերը: 2017 թվականի դեկտեմբերին Նյարան աղիների վիրահատություն է տարել:
Աղջկա ծնողները փորձում են քրոմոսոմային հիվանդությունների մասին հանրության տեղեկացվածությունը մեծացնել: Նյարան հաճախում է «հատուկ երեխաների» մասնագիտացված մանկապարտեզ: Ընտանիքին օգնություն է ցույց տալիս Unique բարեգործական կազմակերպությունը, որի աշխատանքն ուղղված է հազվագյուտ քրոմոսոմային կամ գենետիկ խանգարումներով անձանց սատարելուն: