Կառավարությունը այսօր՝ օգոստոսի 29-ի նիստում հավանություն տվեց «Ձկնային տնտեսության կարիքների համար ջրային ռեսուրսների օգտագործման կարգը սահմանելու մասին» որոշման մեջ փոփոխություն կատարելու նախագծին

Կառավարությունը այսօր՝ օգոստոսի 29-ի նիստում հավանություն տվեց «Ձկնային տնտեսության կարիքների համար ջրային ռեսուրսների օգտագործման կարգը սահմանելու մասին» որոշման մեջ փոփոխություն կատարելու նախագծին։

ՀՀ Էկոնոմիկայի նախարար Տիգրան Խաչատրյանը որոշման նախագիծը ներկայացնելիս նշեց, որ ըստ էության փոփոխության նպատակն այն է, որ Արարատյան դաշտավայրում, որտեղ ունենք թվով 116 ձկնաբուծական տնտեսություններ, սահմանել այնպիսի կարգավորումներ, որոնք կապի մեջ են դնում օգտագործված ջրի քանակը եւ այդ ջուրն օգտագործելու արդյունքում արդյունաբերական արտադրանքի քանակը։. «Երկու տարանջատում է առաջարկվում սահմանել, որ իշխան ձկնատեսակի համար մեկ լիտր վայրկյան ջրի ելքով ջրօգտագործման թույլտվություն ստանալու համար պետք է տարեկան արտադրողն ապահովի 700 կգ արտադրանք, թառափի համար՝ 800 կգ արտադրանք։ Նպատակն այն է, որ խրախուսվի շրջանառու ջրի օգտագործումը կիրառելով այնպիսի տեխնոլոգիական սարքավորումներ, որոն ներկայումս հասանելի են»։

Էկոնիմիկայի նախարարությունը այս վարքագիծը խրախուսելու համար առաջարկեց հավանություն տալ լիզինգով սարքավորումների ձեռքբերման դեպքում պետության կողմից որոշակի գումարի սուբսիդավորման առաջարկին. «Որպեսզի խրախուսենք այսպիսի վարքագիծը առաջարկվում է փոփոխություն կատարել կառավարության 2018 թվականի հուլիսի 19-ի N 893-Լ որոշման մեջ, որով սահմանել էինք, որ լիզինգով սարքավորումներ ձեռք բերելու դեպքում գյուղատնտեսական բնագավառում գործունեություն վարելու ժամանակ սուբսիդավորում ենք 12 տոկոսի 8 տոկոսային կետը, հիմա առաջարկում ենք վճարվող 20 տոկոս առաջին վճարից կառավարությունը կեսը սուբսիդավորի, ամեն գործարքի դեպքում ոչ ավելի քան 6 միլիոն դրամ։ Սա տարածվելու է միայն նոր ջրօգտագործման դիմումների դեպքում»։

Շրջակա միջավայրի նախարար Էրիկ Գրիգորյանը իր հերթին նշեց, որ ջրօգտագործման թույլտվությունների ծավալը տարեկան մոտ 1 մլրդ 100 մլն խմ է. «Նոր թույլտվություններ չեն լինելու, խոսքն այն մասին է, որ մոնիտորինգի ժամանակ կբացահայտվեն այն ջրօգտագործողները, որոնք 1 միավոր ջրով ավելի քիչ ձուկ են արտադրում, քան հնարավոր է եւ քանի որ այս ժամանակահատվածում կլրանա ջրօգտագործման թույլտվության ժամկետը, եթե օրենսդրական փոփոխություն է կատարվել, պետք է համապատասխանեցնեն իրեն ծավալները, որը կնվազեցնի օգտագործվող ջրաքանակը»։