Մեծ Բրիտանիայից 16-ամյա Լեքսի Նեշը կարող էր մահանալ հակաբեղմնավորիչ հաբերի պատճառով. Աղջիկը նախ ուժգին գլխացավ է զգացել և ցավ պարանոցում, բայց բժիշկները ոչինչ չեն հասկացել

Մեծ Բրիտանիայից 16-ամյա Լեքսի Նեշը կարող էր մահանալ հակաբեղմնավորման հաբեր ընդունելու պատճառով:

Sun-ը հայտնում է, որ աղջիկը նախ ուժգին գլխացավ է զգացել և ցավ պարանոցում: Ծնողները նրան հիվանդանոց են տարել, բայց բժիշկներն ասել են, որ դա ընդամենը միգրեն է եւ անհանգստանալու պատճառ չկա, ու աղջկան տուն են ուղարկել:

Սակայն Լեքսիի վիճակը չի բարելավվել: Հակառակը՝ հաջորդ օրը նա փաստացի չի կարողացել տեսնել, խոսել եւ քայլել:

Երբ նրան կրկին հիվանդանոց են տեղափոխել, բժիշկներն այս անգամ որոշել են, որ նրա մոտ մենինգիտ է: Բայց ավելի ուշ պարզվել է, որ առկա է ուղեղի արյան շրջանառության խանգարման հազվագյուտ ձեւ՝ ուղեղի կոշտ թաղանթի սինուսների թրոմբոզ:

Բժիշկներն աղջկա ծնողներին ասել են, որ իրավիճակն անչափ լուրջ է, եւ նա հազիվ թե կարողանա դրանից դուրս գալ: Բայց նրանք, բարեբախտաբար, սխալվել են. Լեքսին դանդաղորեն դեպի ապաքինում է գնացել, նա հիվանդանոցում է անցկացրել 1 ամիս, որից հետո նրան դուրս են գրել, չնայած նրան առայժմ չի հաջողվել ամբողջությամբ վերականգնվել:

Հիմա նա տառապում է հոգնածությունից, գլխապտույտից, ուժգին գլխացավերից, ջղակծկումներից: Խնդիրներ ունի նաեւ խոսքի ու կարճաժամկետ հիշողության հետ կապված:

Բժիշկների կարծիքով՝ հիվանդությունն առաջացրել էր այն, որ դրանից առաջ 9 ամիս շարունակ նա համակցված հակաբեղմնավորիչներ է խմել: Այս դեղամիջոցներում պարունակվող էստրոգենը կարող է մեծացնել թրոմբների առաջացման հավանականությունը: Այսպիսի կողմնակի էֆեկտի դրսեւորման հավանականությունը չափազանց փոքր է մարդկանց մեծամասնության համար, բայց այն մեծանում է թրոմբների ձեւավորմանը հակված մարդկանց շրջանում: Ուստի հակաբեղմնավորիչների նշանակումից առաջ հանձնարարվում է ստուգել՝ պացիենտն արդյոք թրոմբների ձեւավորման հակվածություն ունի՞, թե՞ ոչ: