Խաչատուրյան քույրերի փաստաբանը հայտարարել է, որ նրանց դեմ գործը կարող է կարճվել
Խաչատուրյան քույրերից մեկի փաստաբան Սերգեյ Պարշինը հայտարարել է, որ ՌԴ քննչական կոմիտեի աշխատակիցները փաստաբաններին են հանձնել նրանց հոր դեմ քրեական գործ հարուցելու մերժման որոշումը, ինչը ենթադրում է, որ նա խոշտանգել և բռնացել է դուստրերի նկատմամբ:
«Հետաքննությունն ապացուցել է Խաչատուրյան քույրերի ցուցմունքների ճշմարտացիությունը: Քննչական կոմիտեի աշխատակիցները Խաչատուրյան քույրերի փաստաբաններին պաշտոնապես հանձնել են նրանց հոր՝ Միխայիլ Խաչատուրյանի դեմ քրեական գործ հարուցելու մերժման մասին որոշումը: Որոշման տեքստից պարզ է, որ աղջիկների նկատմամբ բարոյական և սեռական բռնության փաստերը հաստատվել են, իսկ մերժման պատճառը ձևական է և սպասելի, կասկածյալի մահվան կապակցությամբ», փաստաբանի խոսքերը մեջբերում է ՏԱՍՍ-ը:
Քույրերի պաշտպանները հույս ունեն, որ քննիչների կողմից հաստատված փաստերը կօգնեն նրանց ապացուցել, որ աղջիկները ինքնապաշտպանության են դիմել, և այդ ժամանակ նրանց քրեական հետապնդումը կդադարեցվի:
2018 թ.-ի հուլիսի 27-ին Կրեստինան, Անգելինան և Մարիան սպանել են իրենց հորը: Աղջիկները դանակի բազմաթիվ հարվածներ են հասցրել նրան: Այնուհետև նրանք հայտարարել են, որ այլևս չեն կարողացել հանդուրժել ծնողի բռնությունը: Հետմահու հոգեբուժական քննությունը նրանց օգտին է. վերլուծությունը Միխայիլ Խաչատուրյանի մոտ շեղումներ է բացահայտել: